Shillong, Lber 07: U Myntri Rangbah ka Jylla u Conrad K. Sangma ula pynbna ban ai T.2 lak ka jingiarap song pisa sha ka samla Sanfida Nongrum kum ka jingai jingithuh ia ka jingioh mihkhmat ha ka sien kaba nyngkong ia ka ri ha ki lympung ialehkai ka pyrthei bad ka jingthaw histori ban ioh thep kol na ka bynta ka kynhun ialehkai Football ki Kynthei ka ri India ha ka AFC Women’s Asian Cup.
Haba pynpaw ha ka rynsan social media, u Myntri Rangbah ula ong, ba ia katei ka pisa yn pyllait lyngba ka Chief Minister’s Special Grant kum ka jingai burom ia kane ka samla nongialehkai football ka Meghalaya halor ka jingialehkai bha ka jongka.
U Sangma ula pynpaw da kaba ong, “Ka Khun ka Meghalaya kala thaw ia ka histori da kaba long ka kynthei kaba nyngkong na ka jylla ban mihkhmat ia ka ri India ha ka Senior International Level. Nalor kane, ka kyrteng jongka kala rung ruh ha ka jingbuh rekod da kaba thep ia ka kol kaba nyngkong ia ka ri India kata hadien jongka 23 snem ha ka AFC Women’s Asian Cup.
U Myntri Rangbah ula ai khublei ia kane ka nongialehkai halor u mawmer uba kala kynjoh bad pynpaw ia ka jingkyrmen ba kane ka jingjop ka jongka kan ai mynsiem ia kiwei pat ki nongialehkai football kiba dang khynnah na Meghalaya bad na ka thain shatei lammihngi ka ri ha ki kyrdan kiba heh.
Lah ban kdew, ba ka sien kaba khatduh kaba ka ri India kala thep kol ha ka AFC Women’s Asian Cup kadei ha u 23 snem mynshwa kata ha u snem 2003 ia kaba wat ia ka Sanfida ruh ym pat kha.
Ka jingthep kol ka jongka, kam dei satia ha kano kano ka sngi hynrei ha ka sngi kaba ialehkai ha ka sien kaba nyngkong eh ia ka ri India, ym tang ha kano kano ka rynsan hynrei ha ka rynsan iakob kaba heh tam ha ka dewbah.
Ka Sanfida Nongrum kala thep ia ka kol ha ka minit kaba 52 hadien ba kala ioh ban mih bujli hadien jong ka kylla miet pyrshah ia ka Vietnam ha ka AFC Women’s Asian Cup Australia 2026 kaba la long ha Perth Rectangular Stadium ha ka 4 tarik u Lber, 2026 kaba pyni syndon ia ka jingwanphai jong ka jingthep kol ka ri India bad ka jingpynbna ia ka jingmih jong ki durkhmat kiba thymmai ha ka rynsan International.
Ia ka Sanfida hi, ka jingthep kol kala long ka jingkmen ia ka, hynrei kala sngewsih pat haba ka India kala shah pynliem pat ha ka Vietnam ha katei ka jingiakhun.
“Watla nga kmen ban thep ia ka kol kaba nyngkong ha ka sien mih kaba nyngkong ia ka India, nga sngewsih pat ba ngi lah rem ha ka khyllipmat kaba khatduh. Ngi ngin shim ia kane kum ka jinghikai bad ban jam saphrang ban iakhun pyrshah ia ka ri Japan” kala ong hadien jong katei ka jingialehkai.
