Shillong, Lber 24: Ka kynhun ialehkai Football ka ri India kan sdang ia ka jingiakhun ia ka AFC Asian Cup 2027 Qualifiers Final Round, pyrshah ia ka ri Bangladesh ha ka sngi Baar ha Jawaharlal Nehru Stadium, Shillong.
U Coach ka ri India u Manolo Márquez ula banjur ia ka jingkongsan ia katei ka jingiakhun kaba nyngkong da kaba ong, “Ka jingiakhun kaba nyngkong ka long kaba kongsan bha. Kadei ka jingiakob kaba lyngkot, tang ka kynhun kaba ioh ia ka nam lahduh ha ka Group kan ioh rung. Kin don 6 sien ki jingiakhun ngi donkam ban wan nyngkong ha ka jingiakhun. Ngi donkam ban ioh khur bun point tam ban ioh leit iakhun sha Saudi Arabia”.
Ka India ka don ha ka Group A ryngkat bad ka ri Bangladesh, Singapore bad Hong Kong bad tang ka kynhun kaba wan ha ka kyrdan kaba nyngkong kan ioh jaka ban ioh rung ha ka Final Tournament kaban long ha Saudi Arabia.
Ha kaba iadei bad ka jingwanphai biang u Sunil Chhetri ban iakhun na ka bynta ka ri India, u Márquez ula iaroh shi katdei ia une u nongialehkai football ka ri da kaba ong, “U Sunil udei u riwkhraw ha ka jingialehkai football ha India bad uba la ioh thep bun kol ne Top Scorer ha kane ka samoi ialehkai. Ngi lah mad jingeh ha kaban thep kol ha ki katto katne ki jingiakhun kiba la dep, ym ha kaban thaw ia ki kabu ban ioh thep kol. Nga tharai u long shuh shuh u bynta uba kongsan ia ngi”.
Katba u Defender ka ri India u Sandesh Jhingan haba iakren bad ki nongthoh khubor ula pynpaw kumtei kumjuh hi.
“Ngi khmih lynti na u ba yn thep kol, ula dep ban thep 95 kol. Ngi dap da ka jingkmen ba yn don ryngkat lang bad ngi. Da ka jingtbit ka jongu, yn buh ha ka jingma ia kano kano ka kynhun ym tang ia ka Bangladesh.”
Ha kaba iadei bad ka jingiakhun pyrshah ia ka ri Bangladesh, ula ong “Man ba ka India kan iakhun pyrshah ia ka Bangladesh, kan long beit ka jingiakhun kaba itynnad kaba dap da ka jingshongshit bad kaba khluid. Ngi pynleit jingmut ban ioh ia ka resol kaba bha. Lada phi lah long kiba la pynkhreh bha, phi lah ban pynrem ia kano kano ka kynhun ruh hynrei lada phim long kiba la pynkhreh pat, kano kano ka kynhun ruh ka lah ban pynrem ia phi. Ngi leit ban iakhun ia kano kano ka jingialehkai da ka jingmut kaba skhem”.
Watla ha ka FIFA Ranking ka India ka don ha ka kyrdan kaba 126 bad ka Bangladesh ha ka kyrdan kaba 185, hynrei u Márquez ula ong, ba ka jingdon ha ka kyrdan kam pyni ia ka jingkhlain jong ka kynhun. Ula kdew ruh ba ka Bangladesh kan ioh mysniem da ka jingkynthup lang ia u Hamza Choudhury ha ka Midfield uba dei u rangialehkai barim jong ka Leichester City.
Kum shi bynta jong kane ka jingpynkhreh, ha ka sngi Balang jong ka taiew bala dep, ka India kala pynrem da 3-0 ia ka Maldives ha ka jingialehkai paralok.
Katba u Coach ka Bangladesh u Javier Cabrera ula pynpaw ia ka jingskhem jingmut ia ka jingiakhun pyrshah ia ka India.
“Ngi lah ioh mynsiem bha. Ka kynhun kala pynkhreh bad trei shitom bha mynta la 24 sngi, kaba long ka por kaba jrong bha. Ngi khlain bha ban ia kaba ngi ju long bad ngi khmih ia ka jingiakhun kaba itynnad” ula ong.
U Kapten ka Bangladesh u Jamal Bhuyan, uba la ialehkai mynshwa na ka Mohammedan Sporting ha ka I-League, ula pynpaw ia ka jingkmen ban wan biang sha India. “Nga dap da ka jingsngewtynnad ban don hangne. Nga la don ia ki jingsah kynmaw kiba khraw bad nga dap da ka jingsngewkmen na ka bynta ka jingiakhun kaban long lashai ka sngi.Ngi tip ba kan long kaba eh bha hynrei ngin ai ia kaba bha tam”.
