Shillong, Risaw 27 : U Myntri Rangbah ka Jylla Conrad K Sangma hynne ka sngi Palei, ula pyntip ba ka jingiakren pynbeit pud jong ka wat kaba ar bad u Myntri Rangbah ka Assam Himanta Biswa Sarma, kan sa sdang noh ha kine ki khyndiat taiew ban wan.
“Ka jingiakynduh bad u Myntri Rangbah ka Assam ban iakren pynbeit pud, kan sa sdang noh ha kine ki khyndiat taiew ban wan” ong u Conrad haba iakren bad ki lad pathai khubor haba iathuh ba ka dei ka thong jong ka Sorkar Meghalaya Democratic Alliance (MDA) ban ialeh katba lah ha kaban pynbeit noh ia ka jingiakajia pud bad ka Assam.
Kat kum ka jingong jong u, ki Regional Committee kila sdang ban lum ia ki jingialang bad ki Kynhun bapher bapher bad hadien ba kila aiti ia ka kaiphod, ka jingialang hapdeng ki Myntri Rangbah kan sa sdang noh.
“Ka thong jong ka sorkar kadei ban pyniaid shakhmat noh iaka jingiakren pynbeit pud jong ka wat ba ar (Second Phase) bad ka jylla Assam bad hadien bala ioh pdiang lut iaki kaiphod na ki Regional Committee, ngin sa sdang noh ia ka jingiakren bad ka Assam” ong u Conrad.
U Conrad u pyntip ba ia mynta, ka Sorkar Meghalaya bad kumjuh ruh ka Assam, ki dang ap ia ki Regional Committee ba kin pyndep ia ki jingiakynduh ia ki trai jaka, ki Syiem, ki Kynhun bapher bapher bad ki paid nongshongshnong baroh kiba don bynta ha ka jingiakren pynbeit pud.
“Kila don ki Regional Committee kiba la leit jurip ia ki jaka ha ki khappud ban iohsngew ia ka sur u paidbah hynrei ka jingiakren pynbeit pud kan sdang tad hadien bala ioh pdiang ia ki kaiphod na baroh ki Committee” ula ong.
“Ha ka jingshisha, ka jingiakren kala dei ban iaid shakhmat hynrei namar ka jingwan noh ka lehniam Puja bad Diwali, ki kam ki jam kila sangeh noh shipor. Ki Regional Committee kin sa pyntyllun noh shaid shaid ia ki kam khnang ba kin lah ban aiti noh ia ki kaiphod” ula bynrap.
