SHILLONG, Risaw 27: U MLA ka NPP na Phulbari Esmatur Mominin ula kyntait mardor iaki khubor ba ka party kala pynduh ticket ban iakhun haka ilekshon 2023.
Haba kren sha ki lad pathai khubor u Esmatur Mominin ula kyntait ruh iaki khubor ba un sa leit iasoh noh bad ka Bharatiya Janata Party (BJP) naka bynta ban iakshun iaka ilekshon 2023 na Phulbari.
“Nga shu iohi lyngba ki lad pathai khubor haka 25 tarik mynta u bnai ba ma u bad 3 ngut ki MLA kin leit iasoh noh shaka BJP bad kane ka long ka jingialam bakla iaki paidbah khamtam ki nongkyrshan na Phulbari konstitwensi” la ong u Esmatur Mominin.
U Esmatur ula ong ba haduh mynta u dei u MLA jong ka NPP bad haduh mynta um don jingthmu eiei ban mih noh na NPP naka bynta ban leit iasoh sha BJP.
Ula ong ba haba iadei bad ki khubor shah pynduh ticket naka NPP, u Esmatur Mominin ula ong ba un sa iakren bad ki paidbah ka Phulbari konstitwensi bad hadien kane un sa lah ban shim iaka rai khatduh haba iadei bad ka ticket naka bynta ka ilekshon 2023.
