Shillong, 26 Risaw: U Myntri ka Koit ka Khiah ka Jylla James K Sangma ula pynshai ba ka jingthungkam kaba iaid ha ka hospital 100 jingthiah ha Mawkyrwat ka dei kaba la thung tang shipor (contractual) ban pyntyllun ia ki jingshakri katba ym pat pyndep thungkam pura ka District Selection Conmittee (DSC).
Kane ka jingpynshai kala mih halor ka jingmih ki jingkynthoh lyngba ki social media ia ka jingthungkam ha ka hospital 100 jingthiah ha Mawkyrwat, South West Khasi Hills District, kaba la thnem bha ha ka jingiatai bad jingpyrshah jong uba bun balang.
Haba ïakren bad u Myntri ka tnad ka Koit ka Khiah ka Jylla, James PK Sangma u la pynpaw ba um don jing tip ei ei halor ka jingthung kam ha kane ka hospital bad mardor u la pan jingtip na ka Director ka tnad ka Koit ka Khiah, hadien ba ki la mih bun ki jingkynthoh halor katei ka bynta.
“Nga la pan jingtip na ka DHS halor kane bad ki la pyntip ba lathung kam shipor na ka bynta ban pyntyllun ïa ka kam, khamtam ha kito ki kam kiba donkam kyrkieh,” ong u Myntri ka tnad ka koit ka khiah.
Ka jingpan jingtip jong u Myntri na ka DHS kadei hadien ba lamih ka jingkynthoh kaba jur ha ki rynsan social media haba ïadei bad katei ka jingthungkam ha katei ka hospital ba 100 jingthiah.
U la bynrap da kaba ong, “Ka jaka sumar kadei kaba donkam bad dei halor kane ka daw ba ka DHS ka la thung briew mardor katkum ka jingdonkam, katba ym pat lah ban pyndap ïa ki kam kiba lait.”
Shuh shuh na ka liang u Myntri ula ïathuh ba ka jingthung kam pura ha kane ka jaka sumar kan long katkum ka lynti kaba dei ban leh lyngba ka District Selection Committee (DSC).
“Na ka bynta shipor la hap ban shu thungkam shipor khnang ba ka jingai jingsumar kan ïaid shakhmat. Ka jingthung kam ba mynta kadei beit kaba shipor (contractual) khnang ba ngin lah ban bteng ïa ka kam katba ka DSC kam pat lah ban pyndap ïa kitei ki kam kiba lait,” u la ong.
U la bynrap ruh da kaba ong, “Ka jingthungkam lyngba ka DSC ka kham shimpor bad dei na kata ka daw la hap ban thung kam shwa shipor katba ym pat lah ban pyndep ïa ka jingthungkam pura khnang ban pynïaid ïa ka kam.
Haba ïadei bad ki nurse, na ka liang u Myntri u la ong ba ka jingthung kam pura kan dei hadien ba la pynbna ïa ka result jong ki nurse ANM bad GNM, ha kaba ïa kitei ruh yn sa thung ha katei ha hospital ba 100 jingthiah ha Mawkyrwat.
