Shillong, Risaw 27 : Ka Khasi Students Union (KSU) kala dawa ia ka Sorkar Jylla ba kam dei shuh ban nang pynslem ha ka ban tei bad plie noh ia ka Shillong Medical College, kaba lah ban iarap ia ka Jylla ban lait na ka jingduna doktor.
“Ka Sorkar kam dei shuh ban nang pynslem ia ka jingplie ia ka Shillong Medical College. Ka jingslem ban pynurlong ia kane ka College kala wanrah ia shibun ki jingeh bad ki jingduhnong ha kaba bun ki liang haba iadei bad ka sumar sukher, ka koit ka khiah ha ka Jylla” ong u samla Donald V Thabah, General Secretary ka KSU ha ka kyrwoh.
Une u Nongialam ka KSU ula ong “Ka jingud jingnam jong ki bor pyniaid hospital, ki paidbah bad ki bor sorkar na ka por sha ka por halor ka jingduna ki doctor khamtam ki Doktor Specialists ka dei eh namar ba ka jylla wat hadien 50 snem ruh kam pat lah ban pynkha ia la ka jong ka Medical College bad Engineering College kaba pyni ia ka jingbym shimkhia naduh mynshwa haduh mynta da ki sorkar ha kaba ia dei bad ka koit ka khiah, ka pule ka puthi”.
Haba kynthoh pyrshah ia ka jingkren jong uwei u Nongmihkhmat ba ong ba ki Doktor Specialist kiba nabar ki phet lut na Jylla Meghalaya namar ka jingbym ioh ban thied jaka, une u Nongialam ka KSU ula ong “Ka jingkren jong une u Nongmih khmat ka long kaba jyndong shikatdei eh ha kat ka kyrdan ka jong u”.
Ka KSU kala pynrem ruh ia ka jingdawa jong une u Nongmihkhmat ba ong ba dei ban shah noh ia ki doktor bar jylla ba kin thied jaka puta ha Meghalaya khnang ba kin shongduh bad trei ha Jylla.
“Ka KSU ka sngew ba ka jingduna ki Doktor Specialist ka dei na ka daw ka jingbymdon la ka jong ka Medical College ha la ka jylla ka ban pyniaid hi da ka sorkar jylla” ong u samla Donald.
“Jin lada ngi don la ka jong ka Medical College naduh mynshwa ka mut katta, ka jylla kan ym duna, hynrei kan pahuh ki Doktor Specialists kiba dei ki trai Ri trai Muluk ka jylla ki ban shakri shi lynter ha la ka Jylla” ula bynrap.
U samla Donald ula ong ba lada ka Sorkar ka shu ailad lut ia ki doktor bar jylla ban kamai na Jylla bad ioh sa ka thied jaka, kane ka mut ba kala pyniap ia ka jingtrei shitom jong ki nongiakhun Hill State kum u Bah Martin N Majaw bad kiwei kiwei kiba la trei borbah lyngba ka jingiohi jngai ban pynkha ia ka Meghalaya Land Transfer Act kaba long ka atiar ba khlain haduh mynta ban iada ia ki Khasi bad Garo na ka jingshah tyllep ha kiba nabar.
“Ka KSU ka maham ba ym bit da lei lei ruh em ban pyntlot ne pyndkoh ia ka jingtreikam jong ka Meghalaya Land Transfer Act” ula ong.
