Shillong, Risaw 26 : Ka Khasi Students Union (KSU) Education Cell, kala leit ban iakynduh ia u Director ka NEIGRIHMS u Dr Nalin Mehta halor ka jingud jingnam jong ki nongthep kam ba kim ioh ia ki jingtip kiba shai halor ka eksamin thungkam.
Ka KSU hapoh ka jingialam u Education Secretary samla Raymond Kharjana, ka pyntip ba kane ka jingleit iakynduh kala mih hadien ba bun na ki nongthep kam kiba hap ban iakhun ia ka eksamin, kila ud la nam ba kim lah ban ioh ia ki jingtip kiba shai bad ruh ka jingbym lah ban pynrung kyrteng ialade lyngba ka website bala ai.
U samla Raymond ula pyntip ba ka jingiakynduh ka long kaba seisoh ha kaba naka liang u Director ka NEIGRIHMS ula kular ban sa pynbeit noh mardor ia kane ka kam bad ban pynjlan ruh ia ka tarik ban pynrung kyrteng khnang ba ki nongthep kam kin ioh ia ka lad ban pyndep ia ka jingpynrung kyrteng ba kin ioh iakhun ia ki eksamin kam bapher bapher.
