Imphal, Risaw 21 : Ha ka sien kaba nyngkong eh ha ka thain shatei lammihngi (Northeast) na ka liang ka sorkar Manipur kala shim ia ka rai ban thaw ia ka kynhun pulit kiba shong da ki kulai ha ka nongbah Imphal shibynta ban pynneh pynsah ia ka riti dustur synshar syiem jong kiba rim.
U Myntri Rangbah (CM) ka Manipur u N. Biren Singh ula ong ban pynneh pynsah ia ki riti dustur synshar syiem jong kiba rim hapoh ka thain yn thaw ia ka kynhun pulit ki ban shong da ki kulai ha ka sien kaba nyngkong eh hapoh ka sorbah Imphal.
Hadien ka Kolkata, ka Imphal kan dei ka sorbah kaba ar ha ka thain mihngi ka India ka ban don ia ki pulit kiba pyndonkam da ki kulai ha ka sien kaba nyngkong.
“Ban pynneh pynsah ia ka tynrai jong uba rim bad ban kyntiew bad tyngkai ia ki kulai jong ka jylla Manipur, ngi la shim ia ka rai ban wanrah ia ki bor pulit ki ban shong da ki kulai,” ong u CM ka Manipur u Biren Singh ha Imphal.
U Singh ula ong ba ka jylla ha ka por jong ka jingsynshar syiem, ki kulai kila shim ia ka bynta kaba kongsan tam ha kaba iadei bad ki thma bapher bapher.
“Kane ka juk kaba mynta ka dei ban tip, ban bud bad ban pynneh pynsah ia ki riti dustur jong ki longshwa manshwa ka jylla Manipur na ka bynta ban iada ia ka Manipur na ki kynhun kiba na shabar,” ong shuh shuh u Biren Singh.
Nalor kata na ka liang u CM ula ong ruh ba ha ka kylla kaba nyngkong kin thaw shwa ia ka kynhun jong ki 20 ngut ki pulit shong kulai ki ban iaid pahara ha ka sorbah Imphal, kata kaba kynthup ha ki jaka iew.
Ia ka committee bala khlieh da u Inspector General of Police (Zone-1) u Themthing Ngasava la dep ban thaw na ka bynta ban jied ia ki dkhot na ka tnat pulit kata napdeng kito kiba sngewtynnad bad kiba ju mlien ban shong kulai.
Nalor kata na ka liang ka sorkar ka don ruh ia ka jingthmu ban pyniar shuh shuh ia ka jingdon jong kine ki pulit shongkulai ha kiwei pat ki police station khnang ban lah ban kyntiew bad pynneh pynsah ruh ha kaba iadei bad ki kulai jong kane ka jylla, ong shuh shuh u CM ka Manipur.
Ha ka snem 1840, ki bor pulit kiba shong da ki kulai ha ryngkat ki artylli ki waitlam kila sdang ia ka jingiaid lynti ha Kolkata (Calcutta ha ka por barim) bad kylla long ka unit kaba pura hadien ar snem kynthih.
Kumba ka long mynta, ka tnat pulit ka Kolkata kadon 70 tylli ki kulai hapoh ka jingkhmih ka jong ka.
