Shillong, Nailur 8: Kumba 384 ngut ki nongthep vote lah dep ban pynbna ba kim ioh ban thep vote hadien ba lah dep ban khmih bniah bad bishar bniah ha ka jingpyniaid shakhmat ia ka Special Intensive Revision (SIR) 2026, ong u Chief Electoral Officer ka Jylla u Dr BDR Tiwari hynne ka sngi Baar.
“Haduh mynta, 384 ngut ki nongthep vote la shem ba kin ym ioh thep vote hadien ba la dep ban bishar bniah bad pynlong ia ka Hearing” ong u CEO haba shong bishar ia ka jingiaid shakhmat jong ka SIR 2026 bad ki District Election Officer bad ki seng saiñ pyrthei lyngba ka Video Conference.
U Dr Tiwari ula pynshai ba ka jingioh pdiang ia ki notis kam dei satia ba la weng ne pyndam noh na ka thup kyrteng jong ka Electoral Roll.
“Ka notis ka ai ia ka lad ia ki nongthep vote ba kin pynshisha ia ki jingduna bad ban pynbiang ia ki jingtip kiba pura katkum ka jingpan ia ki kot ki sla” ula ong bad ka bthah ba ym shim la don kyrteng kaba la mih ha ka Draft Roll kaban shah weng ne shah pyndam noh khlem da iaid katkum ki kyndon treikam, jingtohkit bad ia ka lad ban iashimbynta ha ka Hearing.
U CEO ula ong, ba na ki 21,69,243 ngut ki nongthep vote ha ka Draft Electoral Roll, lah dep ban ai notis ia 6,51,735 ngut ha kaba 6,20,730 lah dep ban pynpoi ia kine ki notis, katba dang sahteng ban pynpoi sha ki 31,005 ngut. Palat ia ka
2,08,870 sien lah dep ban pynlong ia ka Hearing, kaba long ka jingmihkhmat ia 32.05% na ki notis kiba lah dep ban pynmih.
U Dr Tiwari ula ong, 2,22,786 ngut ki nongthep vote lah dep ban ithuh hapoh jongka kyrdan “No Mapping” bad 4,28,949 ngut bad kiba don jingduna ha ka ‘Mapping’ kaba long baroh 6,51,735 ngut ki nongthep vote kiba la ithuh ba kidei ban shah khmih bniah.
Ula pyntip ruh ba 12,951 tylli ki aplikeshon lah dep ban ioh pdiang hadien ba lah dep pynmih ia ka Draft Roll, kaba kynthup ia ka 6,804 tylli ki Form 6 ban kynthuplang.
Ha kawei pat ka liang, 1,814 ngut ki Booth Level Agent (BLA) lah dep ban thung da ki seng sain pyrthei, 736 ngut da ka NPP, 393 da ka BJP, 320 da ka VPP, 186 ngut da ka INC, 121 da ka UDP bad 58 ngut da ka AITC. Hadien ba kala don ka jingpynthud ha ka nongbah Shillong ha u bnai ba lah dep, ia ka SIR lah pynjlan sa 14 sngi.
Ka Tarik kaba khatduh na ka bynta ka Claims & Objections kan dei ha ka 18 tarik u Nailur, ka Tarik kaba khatduh ban pynkut ia ki Claim/Hearing kan long ha ka 17 tarik u Risaw bad ka jingpynmih ia ka Electoral Roll kaba pura kan dei ha ka 21 tarik u Risaw, la ong u CEO.
