Shillong, Risaw 20: U Myntri kam Pohiing bad nongialam ka UDP ma Lahkmen Rymbui ula kynnoh ba dei namar ka daw jong u ma Vincent Pala ba baroh ki MLA ka Congress kila phet seng lut.
“U President ka Meghalaya Pradesh Congress Committee (MPCC) u dei ban shong puson ba balei baroh ki paralok ba iatreilang (MLA) kila phet lut na u” ong u ma Lahkmen hynne ka sngi Palei.
U Myntri Kam Pohiing ula kynthoh ia kane halor ka jingkynnoh u ma Vincent Pala ba ka UDP ka dei ka party tieng pyut kaba phet jngai ialade na baroh ki jingtynjuh.
“Mar syn wan ma u (Pala) sha Jylla, ka Congress kala duh lut ia baroh ki MLA bad wat ki Kyrtong kiba la shah jied ban iakhun ia ka elekshon 2023 na ka Congress kila phet noh sha kiwei pat ki party” ong u ma Lahkmen.
U ma Lahkmen ula ong ba u ma Pala ula wan na Delhi ban pynmih ia ki jingkynnoh khlem da tip ia ka jingshisha ka dei ka bym iahap kum uta u President ka Party.
“Ka Congress kaba dei ka party ba bun eh ki MLA ha u 2018 kala kylla nod mynta, kala kylla noh namar jongno?… Kala kylla nod namar jong u (Pala)” ong u ma Lahkmen.
Halor kiwei pat ki jingkynnoh jong une u Nongialam ka Congress ba ka UDP ka dei ka party ba bamsap duh hapoh ka sorkar MDA, u ma Lahkmen ula ong” Ngam kwah ban jubab ia kum kane ka jingkynnoh bala pynmih da ka party ka bym don wat tang uwei u MLA ruh ha ka Iingdorbar Thaw ain ka Jylla”.
“Ai ba kan don shuwa uwei ne arngut ki MLA, ngan sa jubab ia kata, ia mynta kat kaba u ong ka dei nod lut. Lada um (Pala) kren ha surok shano pat ba un kren?… Ka Congress ka dei ban kren hapoh ka Iingdorbar. Ban jubab ia u ka long kumba jubab ia ka party ka bym don satia ha Jylla” ula bynrap.
U ma Lahkmen ula ong ba dei namar ka jingbym nang pyniaid jong une u President ba mynta jong ka Congress ba ka party kam don shuh wat tang uwei u MLA hapoh ka Iingdorbar ka Jylla.
