Shillong, Naiwieng 19 : Ka Kynhun Myntri ka Sorkar Jylla ha ka sngi Palei kala ai jingmynjur ia lai tylli ki service rules na ka bynta ka tnad ka koit ka khiah, haba pynbteng ia ka jingpyrshang jong ka Sorkar ban wanrah ia ka jingshai bad ka rukom pyniaid ia ki kam ba iadei bad ka jingkyntiew kyrdan bad ka thungkam thungjam.
U Myntri Rangbah Conrad K Sangma ula iathuh ba kine ki rules bala ai jingmynjur ki dei ka Meghalaya Clinical Psychologist Service Rules, ka Meghalaya Occupational Therapist Service Rules bad ka Meghalaya Family Welfare Education Service Rules.
U iathuh ba ka Sorkar kala pynlong kongsan ia ki Tnad Sorkar ba kin don noh ia la ki service rules hashuwa kano kano ka jinglait kam lane ka jingkyntiew kyrdan.
“Kumba phi iatip, ka Sorkar kala dep shim ia ka rai ba ym dei ban don ka jingthungkam lane kyntiew kyrdan katba ym pat don ia ki service rules” ong u Conrad haba bynrap “Ki dei ki service rules kiba batai kumno ban pyniaid ia ka jingkyntiew kyrdan bad kiwei kiwei ki kam kiba dei ba leh”.
Shuwa kane, bun ki Tnad kila trei ia ki kam da kaba leh kat kum ka jingmih ki jingdonkam (adhoc), ula ong.
Ban pynkylla ia kane, ka tnad Personnel kala shim ia ka rai ba tyngeh ba baroh ki Tnad ki dei ban don noh ia ki service rules, khnang ba kan don ka rukom treikam kaba thikna bad kaba shai.
“Ta ka daw, halor kane ka nongrim, phi lah dei ban iohi ba ha kine ki snem bala leit, la mynjur ia bun tylli ki service rules” ong u Conrad haba bynrap “Nga taharai ha manla ki jingialang jong ka Kynhun Myntri ngi la ai jingmynjur ia kawei ka service rule”.

