Shillong, Naiwieng 19 : Ha ka jingpynbna kaba heh na ka bynta ki nongtrei Sorkar, ka Kynhun Myntri ha ka sngi Palei kala pynmih ia ka jingpynbna halor ka jingthaw ia ka Sixth Meghalaya Pay Commission.
U Myntri Rangbah Conrad K Sangma ula iathuh ba ia kane ka Commission yn khlieh da u Chief Secretary barim ka Jylla Bah DP Wahlang, lem bad ki Heh Ophisar bala shongthait ba kynthup ia u Bah T Lyngwa bad Ambrose Marak kum ki dkhot.
La aipor phra bnai ia ka Commission ba kan pyndep ia ka kam bala bynshet ha ka.
“Nga sngewkmen ban pynbna, khamtam na ka bynta ki nongtrei ka Sorkar Jylla, ba mynta ka sngi ngi la mynjur, bad thaw ia ka Sixth Meghalaya Pay Commission” ong u Conrad haba iakren bad ki lad pathai khubor hadien ka jingialang ka kynhun Myntri.
U iathuh ba ka jingpynbna (notification) ka don ia ki kyndon treikam jong ka Commission, hynrei baroh ki jingsngewkhia ki nongtrei yn sa phah sha ka Commission.
“Ai ba ngan kular ia baroh ba ia baroh ki jingsngewkhia ba ki don, yn sap hah sha ka Pay Commission bad ki long ruh kiba laitluid ban leit iakynduh ia ka Pay Commission” ula ong.
U Conrad u iathuh ba ka Sorkar kala plie ia ka lynti ban bynrap shuh shuh ia ki kyndon treikam ka Commission kham hadien, khnang ban nym ieh ia kano kano ka jingsngewkhia.
U pynkynmaw ba ia ka jingdawa la pynsngew ha ka Dorbar Paidbah ba long ha State Guest House mynta la arbnai eiei.
“Halor ki jingiakren ha katei ka jingialang, Nga la khot mardor ia ka jingialang bad kila sdang ia ka kam ban khmih bniah ia ki briew na ka bynta ka kam Chairman” ong u Conrad.

