Shillong, Naiwieng 18 : Ka Khasi Students’ Union (KSU)-Mawryngkneng Circle, ha ka sngi Balang, kala ioh bat ia saw ngut ki nong Bangladesh kiba la wan rung beain sha Jylla Meghalaya khlem ki kot ki sla kat kum ki ain ka Ri.
Da kane ka jingiohkem, ka KSU kala lap ruh lyngba ki video, ba kine ki briew kila haduh T.45,000 marwei lane shikhlieh sha ki agent ban pynrung ia ki sha India lyngba ki rukom kiba beain, kynthup ka jingpynkhreh ia ki kot ki sla thok kynthup ki Aadhaar Card.
Ha ka jingtohkit, ka KSU kala ioh jingtip ba ia kine ki Bangladesh la wan pynpoi na ka thain Skhenpyrsit, West Jaintia Hills District da ka jingiarap ki katto katne ki briew kiba leh agent ban pynpoi ia ki sha ki jaka ba ki thmu ban leit.
Ka KSU ka iathuh ba u nongniah jong ka kali kaba kit ia kine ki nong Bangladesh, ula kam ba don ba bthah ia u ban leit kit ia kine ki briew da kaba shu phone bad la pynhiar ia ki ha Dam.

Ka KSU ka pynpaw ia ka jingsngewkhia kaba jur ia kane ka jingjia khamtam ba don ki agent kiba pynrung beain ia ki briew sha kane ka Ri lyngba ki kot ki sla ba shna thok.
“Kane ka pynmih ka jingkylli kiba khia halor ka jingsngain jong ka Ri, ka jinglong ba shisha jong ki kot ki sla ba pynithuh ia ki briew bad ka jingtreikam jong ki bor Sorkar kiba dei khmih ia ka rung ka mih ki briew sha ka Ri” kala ong.
Ha kajuh ka por, ka KSU kala maham jur ia kino kino ki briew ne ki kynhun kiba donkti ha ka kam pynrung beain ia ki nongwei sha ka ri, ka jingpynkhreh ia ki kot ki sla thok bad ka jingai jingiarap ban leh ia ki kam kiba long pyrshah ia ka ain.
Ia kine ki saw ngut ki nong Bangladesh la aiti noh sha ki Pulit ka Diengpasoh Police Station na ka bynta ban leh ia kaba donkam.

