Shillong, Naiwieng 18 : Ka Provisional Town Vending Committee (PTVC) kala kyntait ban pdiang ia ka jingbuhpor ka Sorkar ban pynkynriah ia ki nongshong dukan madan na GS Road, Motphran, Iew Mawlong, Stand Jeep, Qualapaty bad kiwei ki bynta ka Iewduh, ha ka 25 tarik Naiwieng, ong ka nongialam ka TUR Kong Angela Rangad ha ka sngi Ba-ar.
Ka kong Angela kala iathuh ba ka jingiakren halor ki jaka shong dukan madan kam pat kut satia.
“Ngi la thoh sha ki da kaba shai bha ba ngim lah ban pdiang ia kane. Ngim pat ai jingmynjur ia ka jaka shong madan kaba la kyntur da ka Sorkar” kala ong.
Ka ong ba wat ki Rangbah Shnong ha ka jingialang kila mynjur ba ia kane ka sienjam ym dei ban kyntur.

“To ngin nym leh kyrkieh ba ngi hap ban pynkynriah ha ka 25 tarik Naiwieng, lane ban pynbor ia ki briew ba kin wan bad shim ia ki COV, namar ha ka COV ngi la pynpaw shai ba shano phin pynkynriah ia ki nongshong dukan madan” kala ong.
Ka kong Angela kala ong ba ki trai bos, kiba pynbiang ia ka leit ka wan ki briew sha ki 5 tylli ki district bad 41 tylli ki Shnong ruh, kila pyrshah ia kane ka sienjam.
“Lada phi knieh noh ia ka jaka pynieng kali jong ki, shano ba kin leit?. Bad phi wanrah ia ka jingkhapngiah kaba jur bha” kala ong.
Ka iathuh ba ka PTVC kala ai jingmut ia kiwei pat ki jaka kum ka Lum Survey bad ka Them Metor bad maham ban leh da kab bor haba iadei bad ka jingpynkynriah ia ki dukan madan”.
Ka kong Angela kala kyntu ia ka Sorkar ba kan weng noh ia ka jingpynbna ba pynmih ha ka 16 tarik Risaw, kaba pynpaw ia ka jingwan ka aiom Khristmas.

