Shillong, Naiwieng 16 : Ka Khasi Hills Bazar Bus Association kala pdiang ia ka jingkhot iakren jong ka Sorkar hynrei kala ieng skhem ba kan nym kyntiah na ka stand kaba don mynta.
Ka association, kaba la iakhih mynta la sans nem, kala shah khot sha ka jingialang ha ka sngi Ba-ar ha Ophis ka Tnad Urban Affairs da u Director ka Tnad Urban Affairs.
U General Secretary Kyrshan Rynjah ula ong ba tang ki nongialam kin iashimbynta ha kane ka jingiakren kat ia ka jingmih, yn sa iakren hapdeng ki dkhot ha ka jaka ba iakhih.

“Mynta ka sngi ka Sorkar kala khot ia ngi sha ka jingiakren lashai ka sngi ha Ophis ka Tnad Urban Affairs, na u Director ka Tnad Urban, namar ka jingiakhih jong ngi kaba la iaid mynta la 5 sngi” ong u Bah Kyrshan ha ka sngi Nyngkong.
“Ka khubor ka long ban wan sha ka jingiakren, bad ngin sa iapeit ia kaei kaban jia lashai, bad kaei kaba kin ong ia ngi” ula ong.
Hynrei ula ieng skhem ba ka jingleit iashimbynta ha ka jingiakrem kam mut ba la pdiang ia ka jingpynkynriah.
“Wat lada ngi leit, ngin ym mih nangne. Ngin ym ap ia kaei kaba ki rai” ong u Bah Kyrshan.
U Bah Kyrshan ula pong ba ka jingiakhih kala pynthut bha ym tang ia ki nongkamai bos hynrei ki paidbah ruh kiba shaniah ha ki bazar bus.
“Kala ktah jur bha, na ki trai kali, sha ki nongniah, nongkyntiew mar,. ki skul, ki college kiba leit sha skul da kine ki bus” ula ong.
“Lashai tang ki nongialam kin leit, bad kat kaba iarai, ngin sa pynlong ia ka jingialang hangne” ong u Bah Kyrshan.

