Shillong, Naiwieng 15: U Majistor ka East Khasi Hills lashai ka 16 tarik u Naiwieng, un shong bishar halor ka jingkynnoh ba dang shen jong ka KSU ba lum pisa beain ki Pulit ha surok National Highway ha ki thain Diengpasoh.
Ia kane ka jingbishar yn pynlong hapoh ka Ophis ka DRDA, East Khasi Hills District, Shillong.
Lah ioh jingtip ba u majistor un shim jingthoh ia ki jingpynsngew kynthup ban shim ruh ia ki sakhi bad ki sabut na ki nongialam bad dkhot jong ka KSU kiba la leit khynra ha ka 30 tarik u Nailur 2026 ia ki sem ba kynnoh lum pisa beain ki pulit na ki trok.
Ki video jong kane ka jingkhynra kala saphriang ha ki rynsan social media, ha kaba ka KSU kala pyni ba ki nongbud trok kila hiar na kali haba kila poi ha Diengpasoh ban leit rung ha kawei ka sem kaba la don hapoh da ki pulit ban leit ai ia katei ka pisa.
