Tura, Naiwieng 14 : Ka jingsawa jong ki ksing tynrai ba 1000 tylli bad ka jingshad kaba iaid kat kum ka sur tem ki 3000 ngut ki nongshad, kala wanrah ia ka jingpynkut kaba iphuh iphieng ia ka 100 Drum Wangala Festival ba 50 snem, ha ka sngi Saitjain, bad pynioh ruh ia ka jaka ha ka Guinness Book of Word Record.
Kane ka jingthaw record ha ka Garo Heritage Village, Wangala A’dam, ha Chibragre kaba hajan Tura, ka la long ka bynta kaba kongsan tam jong ka jingrakhe ïa ka Golden Jubilee kaba saw sngi lynter, kaba pyni ïa ka jingriewspah ka kolshor, ka jingput jingtem bad ki riti dustur jong ka jaitbynriew Garo.
Kane ka tamasa kaba la pynlong naduh ka 11 haduh ka 14 tarik u Naiwieng, ha ka sien kaba 50, ka la wanrah lang ïa ki hajar ngut ki nongshim bynta bad ki nongwan peitkai, kaba la pynlong ïa katei ka jaka kum ka rynsan kaba dap da ka jingkmen ban rakhe ïa ka jinglong tynrai bad ka kolshor jong ki Garo.
Ka bynta kaba kongsan tam ka long ka jingpyni sap kaba ïaid ryngkat ha kajuh ka por jong ki 1,000 ngut ki nongtem ksing tynrai, kiba la tip paidbah kum ka ‘Rhythm of 1,000 Drums’, ryngkat bad ki 3,000 ngut ki nongshad. Kane ka jingjop ka la pynkiew ïa ka nam jong kane ka tamasa sha ka kyrdan kaba pawnam ha ka pyrthei, kaba la nangsan bad kylla long kawei na ki rynsan pyni ïa ka kolshor tynrai kaba heh tam ha ka thaiñ Shatei Lam Mihngi jong ka India.
U Myntri ka Sorkar Pdeng ba khmih ïa ka tnat Culture bad Tourism, u Gajendra Singh Shekhawat, u la ïashim bynta ha ka jingïalang pynkut ryngkat bad u Myntri Rangbah ka Meghalaya Conrad K Sangma.
Ka jingrakhe ïa ka Golden Jubilee ka la pynurlong ruh ïa ka jingangnud kaba la slem bha jong u nongïalam ka Meghalaya bad u Lamphang barim ka Lok Sabha, u Purno A Sangma, uba la don ïa ka jingthmu ban pynheh ïa ka tamasa 100 Drums sha ka jingpyni sap tem kaba kynthup haduh 1,000 tylli ki ksing.
U Myntri Rangbah ka Jylla Conrad K Sangma, u la ban jur ïa ka jingdonkam ban ïada ïa ka jinglong kyrpang jong ki tamasa bapher bapher ka Meghalaya, haba pynpaw ba ka Wangala kan bteng ban neh ha ki riti dustur tynrai jong ki Garo, katba ki tamasa Me’gong bad Cherry Blossom kin pynleit jingmut ha ka put ka tem bad ki kam pynbyrngia.
Haba kynmaw ïa ka jingangnud jong u kpa jong u ha ka sngi plie ïa ka tamasa ha ka 11 tarik u Naiwieng, u Conrad Sangma u la ong ba kane ka jingrakhe ïa ka Golden Jubilee ka la long ka kabu ban pynurlong ïa kata ka jingthmu.
Nalor ka jingpyni sap kaba heh, ka tamasa ka la don ruh ïa ki jingshad tynrai jong ki Garo, ki jingrwai tynrai, ki jingïalehkai tynrai bad ki jingïakop bapher bapher ha ka liang ka kolshor. Palat 300 tylli ki dukan ba die ïa ki jingbam tynrai, ki jaiñ thaiñ da ka kti, ki tiar shna kti, ki jingdeng tynrai bad kiwei pat ki mar, kaba la ai lad ïa ki nongshna tiar tynrai bad ki nongsengkam ban pyni bad kyntiew ïa ki kam jong ki.
Ka tamasa 100 Drums Wangala ka dei kaba la sdang nyngkong eh ha u bnai Nohprah jong u snem 1976 ha Asananggre, West Garo Hills. Hadien 50 snem, kane ka tamasa kam shym la paw tang kum ka jingïalang ban pyni ia ka kolshor kaba heh, hynrei ka la ïoh ruh ïa ka jingithuh ha ka pyrthei lyngba kane ka jingtem ksing tynrai.
