Shillong, Naiwieng 13 : Khathynniew na ki 42 tylli ki karkhana ha Byrnihat kila shah pynhap ha ka thup dak saw (red category), kala la pynbor ia ka Central Pollution Control Board (CPCB) ban thaw ia ka Task Force ka ban leit jurip ia ki Industrial Area sha ka liang jong ka Assam.
Kane kala paw pyrthei ha ka jingshong bishar jong ka Iingkashari Meghalaya High Court ha ka 10 tarik Naiwieng ia ka Public Interest Litigation (PIL) ba iadei bad ka jingjaboh ka lyer ha Byrnihat.
Ka CPCB, ha ka affidavit bala aiti sha ka Iingkashari, kala kdew ia ki kam bala lah ban leh eiei halor ka jingpynmih tdem jaboh ha kine ki industrial area. Ka jingthaw ia ka Task Force ka long kaba kongsan namar ka jingjaboh ka lyer ka Byrnihat ka long ka jingsngewkhia kaba jur na ka bynta ki briew kiba sah ha ka thain kiba don ha shilynter ka khappud ka Meghalaya-Assam.
Ka Iingkashari kala shong bishar ruh ia ka kaiphod bala aiti da ka Meghalaya State Pollution Control Board (MSPCB), NHIDCL, ki bor district ka Ri-Bhoi bad ka Meghalaya Industrial Development Corporation (MIDC), kiba kdew ia ki sienjam ba kila shim ban tehlakam ia ka jingpynjaboh.
Ka MSPCB kala pyntip ba kala pynlong ia ki jingleit jurip bad peitthuh ia ki karkhana bad kala khmih ruh ia ki jaka pynlait ia ki jaboh, ki nala, ki jaboh ba pynmih da ki karkhana kiba tuid sha ka wah Umtrew. La thaw ruh ia ka Joint Action Committee na ka bynta ka Byrnihat Industrial Area. Ka Board kala pyntip ruh ia ka Iingkashari halor ka jingthmu ban buh ia ka Regional Office ha Byrnihat bad ban pyniap ia ka jingpeitthuh ia ka jinglong ka um hapoh ka wah Umtrew.
Ha kajuh ka por, ka NHIDCL, kala pyntip ia ki sienjam ba kala shim ban tehlakam ia ka jingpum pum bad ka jingbret jakhia ha lyndet ka surok National Highway. Kala pyntip ruh ba kala ker ia ki jar nar ha ki jingker ka jingkieng bad ki jaka ba marjan ban khanglad ia ki briew ba kin bret jakhlia nalor ka jingkieng.
Ki bor district ka Ri-Bhoi kila pyntip ia ka Iingkashari ba ia ka Material Recovery Centre la tei hapoh ka jaka ka MIDC. La sam ruh ia ki kali electric lyngba ka Umling Block ban pynshlur ia ka jingkamai ki kali bym pynmih tdem ha ki shnong ki thaw ba don sawdong ka Byrnihat.
Ka MIDC kala pyntip ba kala pyntrei ia ka kam ban pynbha ia ka surok ba pyniasoh ia ka Maithan Alloy bad ka Shyam Century ha ka Export Promotion Industrial Party.
Haba shimkhia ia ki sienjam bala shim da kine ki bor treikam, ka Iingkashari ka sngew ba kala don ka jingpynbha ha ki kam bala leh pyrshah ïa ki karkhana kiba pynjaboh ïa ka mariang. Kumta, ka ïingbishar ka la weng noh ïa ki notice kiba la phah sha u Member Secretary jong ka MSPCB, u Dr. George Hagi Chyrmang bad u Senior Environmental Engineer, u Sandrew Syiem.
Ka ïingbishar ha ki por ba la dep ka la dawa jingpynshai na kine ki arngut ki ophisar halor ka jingbym don ki sienjam kiba biang ban ïakhun ïa ka jingpynjaboh ia ka mariang. Ka ïingbishar ka la pyllait ruh ïa ki na ka jingdonkam ban wan mih hi dalade ha ka jingshong bishar.
Ia kane ka PIL yn sa shim biang ha ka jingshong bishar ha ka 7 tarik u Nohprah. Shuwa kata, u amicus curiae, u Philemon Nongbri, un ïoh lad ban bishar bniah ïa ki kaiphod bad ki kot ki sla kiba la aiti da ki bor sorkar.
