Shillong, Naiwieng 11: U Myntri ka Sorkar Jylla bad MLA ka South Shillong Constituency u Bah Sanbor Shullai ha ka sngi Balang ula ong, ba ka jingiakhih pyrshah ia ka Shillong Peak Ropeway Project ka dei ka jingleh politik bad kynnoh ba ka Joint Action Committee (JAC) ka la wanrah da ki briew na kiwei pat ki seng saiñ pyrthei ban pynmih ia ka jingklumar.
Haba kren hadien ka jingialang kaba la dep lum da ka South Shillong Advisory Committee, ia kaba la pyniaid hi da u Bah Sanbor, ula ong ba ka JAC kala khot ia ki briew kiba nabar ka Constituency kaba dei ka jingialang thik tang na ka bynta ki 26 tylli ki kynhun ka thaiñ.
“Ka jingialang kaba nga lah lum kadei na ka bynta ki 26 tylli ki kynhun kynthup ia ki Dorbar Shnong bad ki seng kiba hapoh jong ka shnong, hynrei ka JAC, kala khot bad iawer da ki briew kiba nabar suba” ula ong.
“Mar ia rung ha ka jingialang, kila don ki longkmie ki bun bha. Nga kylli ia ki shaei ki sah, kila ong ba kidei na Nongmensong, Malki, Lawsohtun, Polo. Kumta ka mut ba ka jingthmu jong kitei ki briew ka long ban pynmih ia ka huri hura, kumba kila leh ha kiwei kiwei ki jaka”.
“Kum u MLA ka thaiñ, Ngam sngeweiei hynrei kila bun palat ki nongkynshoit. Kane kadei ka jingleh buit politik, ka jingkynshoit politik da ki dkhot kiba na ki seng saiñ pyrthei ki bapher bapher” ula bynrap.
Haba kylli la ki dkhot ka JAC kidei kiba donbynta bad kino kino ki seng saiñ pyrthei, u Bah Sanbor ula jer kyrteng ia ki arngut.
“Hooid, namar ba ha ka elekshon kaba la dep ha u snem 2023, i Kong Venetia Mawlong (JAC executive member), ila iakhun na ka seng Congress,” ula ong.
“Ngi don ruh sa uwei, ngam kynmaw bha ia ka kyrteng hynrei udei na Lawsohtun bad udei na ka jait Rynjah, ula iakhun ia ka elekshon MDC na ka seng KHNAM bad ki don bun ki dkhot jong kiwei kiwei ki seng saiñ pyrthei” ula ong.
Haba kylli la ka don kano kano ka jingpyrshang ban ban ktah kti ia u ha ka por ba ula mih noh na ka jingialang, u Bah Sanbor ula ong, ba um lah ban pynthikna paka ia kane, hynrei ula kdew pat ia ki video kiba la saphriang ha ki rynsan social media.
“Ia katei ngam lah ban ong eiei, hynrei hooid, phi lah iohi ha ka social media, ki lah sdang kumba kila leh ha ki taiew kiba lah dep, ki leit ban hylla bad sdang ban thombor ia ki Dorbar Shnong, Rangbah Shnong kumba phi lah iohi” ula ong.
U Bah Shullai ula ong ba katei ka jingiakhih kan ym ktah eiei ia u ha ka elekshon ban wan bad ula ong, ba ha ka elekshon ban wan un dang jop bun shuh shuh.
“Ha kaba kut hi ka sngi, ha ka elekshon kaba lah dep nga lah jop da 13,000 vote, ha ka elekshon ban wan jop syndon da palat 20,000 vote” ula ong.
Haba kyrshan ia ka Ropeway Project, ula ong ba ka Raid Laban Dorbar Pyllun mynshwa kala kyrshan namar ba kan dei ka lad ban aikam aijam.
“Ka Raid Laban Dorbar Pyllun ha katei ka por, kala tip ba lyngba ka Ropeway kan plie lad ia ki samla ka thaiñ ban iohkam iohjam (Technically and Non-Technically)” ula ong. “Kin don ruh bun bah ki dukan, kaba ki trai shnong kin ioh ban plie ia ki dukan ki bapher bapher bad kan ai jingmyntoi ruh ia kiba kamai niah kali, kumba kala jia ha kylleng ki bynta jong ka ri India bad ha kiwei ki ri ruh”.
Ula ong ba ka sorkar mynta kan hap ban shim ia ka rai kumno ban iaid shakhmat.
“Mynta, nga tharai ka Sorkar ka hap ban khmih bniah kumno ban iaid shakhmat bad kane ka projek” ula ong.
