Ka jingiakren ka dang iaid, ka jingkhang ka plie beit ban wan iakren
Shillong, Naiwieng 11 : U Myntri ka tnad Pule Puthi Bah Lahkmen Rymbui ula kyntu ia ki nonghikai deficit ba kin pynsangeh noh ia ka jingsangeh treikam ba khlem pud, haba pyntip ba ki jingiakren ki dang iaid mynta, ka jingkhang ka Sorkar ka iai plie beit, bad ka jingsangeh leit shim klas kan ktah jur eh ia ki khynnah pule.
Ka Khasi Jaintia Deficit School Teachers Association (KJDSTA) kala sdang ia ka jingiakhih da kaba sangeh treikam khlem pud hynne ka sngi Balang.
U bah Rymbui ula ong ba ka Sorkar ka ju pyntip beit sha ki nonghikai ia kaei kaba la dep leh bad kaei ka ban hap leh, ha kaba u Commissioner & Secretary u ju lum ia ka jingialang manla ka taiew bad ia ka shihti ba thymmai lah dep ban phah sha u President bad u Secretary ka Association ha ka sngi Balang.
“Ka jingiakren ban pynbeit ia ki jingeh ba iadei bad ka jingpyniaid ia ki skul ka dei kaba ju pynlong na ka por sha ka por, bad haba iadei bad ka jingeh jong ki nonghikai deficit, ka Sorkar kala pyntip ruh sha ki ia kaei kaba la leh bad kaei ka ban dang hap leh” ula ong.
“La synshar ia ki da ka synshar paidbah, kaba ngi hap ban burom. Ka Sorkar kam shim leh ia kano kano ka kam katba ka mon bad kam ju pyndonkam ia ka bor haba phai sah kino kino ki kam kiba iadei bad ka hok jong ki nongtrei” ula bynrap.
Haba kyntu ban kiar na ki jingiakhih, ula ong “Ngin ym ioh jingmyntoi eiei na kane ka jingsangeh treikam, na ka jingpep ban leit shim klas, namar kane ka ktah beit beit ia ki khynnah skul. Nga sngew ba ngim dei ban pynlong ia ki khynnah skul, ki khun jong nga jong phi hi, ba kin mad ia ka jingduhnong”.
“Haba iadei hi bad ka Sorkar, ka jingkhang jong ngi ka long kaba plie beit. Haba ki jingiakren bad ki jingai khubor na ka Sorkar ki dang iaid, Nga kyrmen ba ki nonghikai kin sngewthuh ia kaei kaba ka Sorkar kala dep leh bad kaei ka ban sa leh. Nga kyntu ia ki ban pynsangeh noh ia ka jingpep ban leit shim klas” ula ong.
U Bah Rymbui ula ong ba kane ka jingpynthut ia ka kam kan ktah ia ka jingdawa ki nonghikai hi haba kynnoh baka Association kala jied ia ka por ban sangeh treikam tang ban pynbor ia ka Sorkar Jylla.
“Kano kano ka kam kaba kynthup ia ka jingpynthut kan ktah khlem pep ia ki jingmyntoi kaba ngim lah ban kyntait. Ka por ba pynlong ia kane ka jingsangeh treikam ka dei ruh ha kata ka rukom, ban peit kumno ban pynbor ia ka Sorkar ha kaban ioh ia kiei kiei” ula ong.
Halor ka Dearness Allowance, ula ong ba ia ka jingpynkiew ia ka DA ka dei kaba lah dep ban leh bad ia ka arrear lah phah sha ka Tnad Finance ba kan pynlait.
“Haba iadei bad ka DA, kam dei satia kaba ngi khlem pat pynkiew, ngi la pynkiew ia kaei kaba ki dei ban ioh. Hooid, ki arrear ki dang sah, bad halor kane ruh, ngi la phah sha ka tnad Finance bad kan pynlait noh” ula ong.
Halor ka tulop, ula ong ba ka jingslem ka jingsiew ha u bnai bala lah ka dei namar ka jingpynkylla ia ka head of account kaba ktah lut ia baroh ki nongtrei Sorkar.
Halor ka MACP bad CPF, ula ong “Kaei kaba lah ban leh, ngin sa leh ia kaba donkam. Halor ka jingiakren halor ka CPF Rules 2023, 2026, ki tip kham shai ma ki. Ngam donkam ban batai, ki tip kham bha”.
Haba kyntait ia ka jingkynnoh ba ka Sorkar kala khang ban pynbna ia ki kam nonghikai deficit kiba lait, u Bah Rymbui ula kdew ia ki jingpynbna laitkam ba manla ka sngi ha ka jingthungkam nonghikai.
“Peit ia ki kot khubor mynta ka sngi, hato ka don ne em ka jingpynbna laitkam jong ki nonghikai? Lada kam don ka jingthungkam, kumno ngin pynlait ia ka?. Jan manla ka sngi kila mih ki jingpynbna laitkam nonghikai. Ban kynnoh ba ka Sorkar ka khang, ka long kaba bakla shibun” ula ong.
“Ki bor pyniaid skul bad ki committee kila wan sha ngi lada don kino kino ki jingeh, bad ngi ju pynbeit ia ki jingdonkam jong ki” ula bynrap.
