Dep jubab ia ka jingsngewkhia halor ka um bad ka khlaw
Shillong, Naiwieng 11 : Ka Tnad Tourism ha ka sngi Balang kala ban biang ba ka long kaba kloi ban iakren bad ka Joint Action Committee against the Shillong Ropeway Project, haba pynpaw ba man ki jingsngewkhia bala pynsngew haduh mynta ki dei kiba la dep shong bishar bad la jubab lyngba ki jingpynshai kiba la buh ha ki jingthoh.
Ha ka kyrwoh, ka Tnad ka ong ba kala khot ia ka Committee ban iakynduh ha kano kano ka rukom kaba ka kwah, la ka dei ka jingiakynduh bad baroh ki kynhun ba don bynta ha ka kam, ka jingia kynduh bad ka tnad marwei lane ka jingiakren bad ki Heh Ophisar.
Ka ong ba ka burom ia ka jingsngewkhia bala pynpaw da ki Kmie bad ki nongshongshnong na ka bynta U Lum Shyllong bad ka jingkyrduh um ka Shillong, ka jingsngewkhia kaba ka tnad ruh ka mynjur, bad pdiang ia ka jingkyrpad jong ka seng ki longkmie ban pynlong ia ka jingiakren.
Ka tnad kala phaidien ia ka jingiakren haduh u bnai Nailar mynta u snem, haba ka pynlong ia ka jingia jurip lang ia ki tyllong um bad ka tnad PHE, Forest bad Shillong Municipal Board ryngkat ka Raid Laban Dorbar Pyllun.
Ha u bnai Risaw, kala pynlong ia ka jingialang bad ka JAC bala pyniaid da ka Commissioner & Secretary ka tnad Tourism, ha kaba u Environmental Specialist ka project ula ai ka jingbatai, bala pynbud da ka jingialang jong ki kynhun bapher bapher kynthup ka Dorbar Pyllun, ki Rangbah Shnong jong ki hynniew shnong, ka JAC, PHE, Municipal Board, ki Technical Agency bad ki lad pathai khubor.
La pynlong ruh ia ka jingiasyllok paidbah ha ka 4 tarik Naiwieng ha State Convention Centre, kaba la pyniaid da u Chief Executive Officer ka Meghalaya Ropeway Development Authority, ia kaba la khot iashim bynta lang online da ki ropeway designer bad ka JAC.
Halor ka jingkyrduh um, ka Tnad ka ong ba ki map bala pyni ha ka jingialang ki pynti ba ki umpohliew ki dei kiba jngai na ka jaka ban pyniaid ia ka project, don kiba jngap hapdeng 500 meter bad 1km. Ki tower, ka ong, ka ieng ha ka jaka ba long lum ka bym don satia ia ka tyllong um, katba ka catchment jong ka Dam Mawphlang ka don sha uwei pat u lum.
Ha kaba ïadei bad ki dieng, ka tnat ka la ong ba la pynkylla ïa ka lynti iaid jong ka projek kaba long kham shajrong hadien ba lap ïa ka jingdon ki dieng kiba jrong ha ka lynti ba la thmu ban shna nyngkong. Kane kan pynlong ïa u cable bad ki cabin ban ïaid halor jong ka khlaw bad pynduna ïa ka jingdonkam ban ot ïa ki dieng.
Halor ki mrad khlaw bad ka mariang, ka tnat ka iathuh ba la dep ban pynlong ïa ka Environment and Social Impact Assessment bad la bishar biang ïa ka da ki riewshemphang kiba laitluid. La pynlong ruh ïa ka jingwad bniah lyngba ki camera trap ryngkat bad ka Forest Department, bad yn pyntreikam ïa ka management plan kham hashwa, ha ka por bad hadien ba la pyndep ïa ka jingtei.
Ka tnat ka la ong ba ïa ka jing ïasyllok paidbah la pynlong ha u snem 2022 da ka Meghalaya Institute of Governance hapoh ka Environment and Social Management Plan jong ka projek, hadien ba la phah ïa ki shithi sha ki Rangbah Shnong jong baroh hynñiew tylli ki shnong ban khot bad kyntu ïa ki nongshong shnong ban wan shim bynta.
Halor ka jaka bad ka jingshngaiñ, ka tnat ka la ong ba ïa ka lower terminal ha Madan Laban yn tei ha ka jaka kaba ju pyndonkam mynshwa kum ka nursery jong ka Tnad Forest . Katba ïa ka upper terminal hapoh Shillong View Point yn tei ha ka jaka kaba la aiti da ka Raid Laban Dorbar Pyllun.
Ka ropeway, ka la ong, la shna katkum ki kyndon jingshngaiñ jong ka Europe, bad ïa ka design ka la dep ban bishar bniah ia ka jingshngaiñ da ka IIT. Ka ropeway kan kit tang ïa ki nongleit nongwan bad kan ym kit ïa ki mar.
Ha kaba ïadei bad ki jingbit, ka tnat ka iathuh ba kala ïoh ïa ki jingmynjur bad ki No Objection Certificate (NOC) na ka Indian Air Force, ka Indian Army bad ka Airports Authority of India.
Ka la bynrap ba katkum ka jingpynbna kaba treikam jong ka Union Ministry of Environment, Forest and Climate Change, ki projek ropeway kum kane kim donkam ban shim ïa ka environmental clearance.
