Shillong, Naiwieng 9: U President ka BJP Meghalaya u Rikman G Momin hynne ka sngi Nyngkong ula pynpaw ba katto katne ngut ki MLA bad ki MDC kila wan ban iakynduh ia ka seng ban pyniasoh bad ia ka rai kaba khatduh yn sa shim hadien ka 15 tarik u Naiwieng hadien ka jingiakynduh bad ki nongialam kiba hakhmat jong ka BJP ha nongbah Delhi.
U Momin ula ong ba ka seng kala jam shaphrang na ka jingkiew ka nombor sha ka kam, ha kaba ka Coordination Committee na ka bynta ki 4 tylli ki mat jingdawa kiba kongsan yn sa pynbna noh tang hadien ba kila wan na Delhi.
“Ka Coordination Committee na ka bynta ki 4 tylli ki mat jingdawa kaba la khlieh da u MLA yn sa pynbna hadien ba la wanphai na Delhi” ula ong. “Ka kynhun jong ka Seng Kmie kan sa iatreilang bad ki MLA jong ka Coordination Committee khnang ba ia kitei ki mat yn lah ban pynbeit noh mardor”.
Ula ong ba ka BJP Meghalaya kan leh ia ka bynta kaba kongsan ha kaban pynbeit ia kitei ki mat lyngba ka jingkyrshan jong ki MLA ka BJP.
Katkum ka jingong jong u Momin, ki 8 ngut ki MLA kiba la pyniasoh dang shen bad ka BJP kila leh da ka jingthmu kaba shai kdar, ban pynbeit noh ia ki 5 tylli ki mat jingdawa kiba kongsan kiba ka jylla ka mad bad ka jingpyniasoh ka jongki kala dep ban pynkylla ia ka jinglong jingman ha Delhi.
“Kane ka long kaba paw shai kdar kumno ki kam kila iaid sted bha hadien ba kila rung sha ka seng. Ngi lah ban iohi shai kdar, haduh katno ka Sorkar Pdeng kala shimkhia ia ngi hadien ba kala don ka jingkiew ha ka nombor” ula ong.
“Ki jingjia kiba bha lah ruh ban iohi hadien ba ia ka Coal Committee bad ka JPC Committee kila wan jngoh ia ka Shillong hadien ka jingkiew kynsan jong ka jingdon ka BJP ia ki MLA ha ka Jylla” ula bynrap.
U Momin ula kyntu ruh ba dei ban weng ia ka jingsheptieng jong ki kynhun Khristan, da kaba ong, ba ka seng kan iada ia ka bha ka miat bad ban shimkhia ia katei ka mat beit beit bad u Chairman ka JPC ha Delhi.
“Ngi ngin pynthikna ba ka bha ka miat jong ki kynhun Khristan ha ka Jylla kin dei kiba la pynkhlain bad kiba ioh ia ka jingpynneh pynsah kaba shisha” ula ong “Ngin leit ban iakynduh ia u Chairman ka JPC ha Delhi ban pynsngew ha u halor ka nongrim kaba ka BJP Meghalaya ka ieng bad ban ai jingmut ia kaba bha tam ban lah ban weng ia katei ka jingeh. Ia ki mat yn ym lah ban pynbeit khlem ka jingtuklar jongka seng BJP ka Jylla”.
Ula pynkut da kaba ong, ba dei ban pynkup bor ia ka BJP da kaba pynjop bun ngut ki MLA khnang ba yn lah ban pyniaid sted ia ki kam pynroi.
“Ki paitbah kidei ban sngewthuh, ba lada ngi kwah ba kiba bun ki mat yn pynbeit noh bad ki kam pynroi kin iaid sted, ki paitbah kidei ban ailad ia ka BJP ban jop bun ngut hapoh ka iingdorbar thawaiñ bad ban iohi ia ki jingiapher kiba bha kiban leh na ka bynta ka Meghalaya bad ia ki paitbah” ula ong.
