Shillong, Naiwieng 09 : Ka Khasi Students Union (KSU) kala ujor da ka ejahar ba kynnoh ba ka kynhun ba tap durkhmat bad ba rah tiar pynmynsaw kynthup ka wait, ki dieng bad ki nar-rod, kila khang lynti, byrngem bad thombor ia ki nongialam bad nongshongshnong ka Shnong Nongrim ha ka jingleit jurup ia ka jaka ban shna ia ka karkhana ka Shree Cement ha Daistong, East Jaintia Hills- bad kynnoh ba ki Pulit kiba don ha kane ka jaka kila shu peitkai bad ailad ia ki nongthombor ban leh kat kaba ki mon.
Ha ka kyrwoh ba pynmih ha ka sngi Nyngkong, ka KSU Central Executive Council kala ong ba kane ka jingjia kala jia ha ka 7 tarik Naiwieng, haba ki nongialam kila leit sha Daistong bad Shnongrim ban iakynduh ia ki nongshongshnong halor ka jingtyrwa ban seng karkhana dewbilat.
“Ka jingleit jong ki nongialam ka KSU ha ka 7 tarik Naiwieng sha Daistong bad Shnongrim ka long shi bynta ban iakynduh bad iakren bad ki nongshongshnong ka thain, khamtam haba iadei bad ka jingthmu ka Shree Cement ban seng karkhana ha Daistong” ong ka KSU.
Kat kum ka jingong ka KSU, ki nongialam kila iakynduh nyngkong ia ki nongialam shnong ban iakren ia ki jingsngewkhia ki nongshongshnong, pynlong ia ka jingialang kaba lyngkot kaba iashimbynta da ki riew rangbah, ki longkmie bad ki samla bad hadien kila leit ryngkat ki nongialam Shnong ban leit jurup ia ka jaka ban pynieng karkhana ha kaban peit la ki kam ki dang iaid ne em katba ka jingtohkit jong ka Fact Finding Committee ka dang iaid.
Dei ha ka por ba leit jurip, ka KSU kala kam, ba kala mih ka jingpynthut bad jingthombor.
“Hynrei, katba ka seng bad ki nongshongshnong ki dang leit ban jurip, kynsan kynsan kumba 6 haduh 10 ngut ki briew bala tap durkhmat kila mih bad pyrshang ban khang lynti ia ka seng bad ia ki nongshongshnong ba kim iaid shakhmat” ong ka kyrwoh.
“Kine ki briew kila wanrah ruh ia ki tiar pynmynsaw, kynthup ki wait, ki dieng bad ki nar-rod, bad kila pyrshang ruh ban thombor ia uwei na ki dkhot jong ka seng” kala bynrap.
Ka KSU ka ong ba ki dkhot kim banse ban iada ia kane katba ki nongialam ki dang pyrshang ban pyn jai jai ia ka jinglong jingman. Ia kane ka jingiakhru la ioh ban ring video bad la pynphriang ha ki lad pathai khubor.
Ka Seng kala kynnoh ia ki Pulit ba kim shym la leh eiei bad suba jur ba don ka jingiasuhbuit sopsop.
“Kaei kaba sngewkhia ka long ba hadien ka jingjia, haba ki nongialam ka seng ki leit ban pyntip sha ki pulit kiba don ha katei ka jaka, kim shym la leh eiei ban kem ia kine ki nongthombor, watla ka seng kala pan ia ka jingiarap. Hynrei, ki Pulit kila ailad ia kine ki briew ba kin mih na kane ka jaka” kynnoh ka KSU.
Ka iathuh ba u General Secretary um banse ula phone ia u Superintendent of Police ka East Jaintia Hills ban pyntip ia kane ka jingjia, hynrei watla katta ym shym la leh eiei pyrshah ia kine ki nongthom bor.
“Ka Seng ka ong ba kane ka jingjia kala pynsuba ba don eiei halor ka jingtreikam jong ki Pulit, ka lah ban don ka jingiatreilang hapdeng kine ki briew kiba pyrshah ia ka KSU bad ki Pulit” ong ka kyrwoh.
Ka KSU kala kyntait ia ka jingkynnoh ba markylla ba ong ba ki dkhot ka KSU kila shoh ia kane kawei ka kynhun.
“Kaei kaba pynlyngngoh bad pynsngewkhia ia ka Seng ka ong ba hadien kane ka jingjia, u Miki Sukhlain, Khreh Sukhlain bad katto katne ki briew ba tap durkhmat, kiba la wanrah ia ki tiar pynmynsaw bad pyrshang ban khang lynti, kila mih sahkhmat bad kynnoh ba kila shah shoh” kala ong.
Ka KSU ka kynnoh ba kane ka jingjia ka lah ban leh ka jingpyrshang jong ki briew kiba don jingiadei bad ki nongkyrshan ne ki agent ka Shree Cement ban thaw ia ka jingkulmar bad pynbitar ia ka KSU.
Haba ai ia ka jingmaham kaba tyngeh, ka KSU kala ong “Wat pynbitar, pynbor ne pyndom ia ka Seng lyngba ki buit jakhlia bad ki jingbyrngem byrsit. Ka seng kala pynkhreh ban ieng skhem hala ka nongrim bad ban shim ia ka sienjam kaba donkam kat kum ka jinglong jingman ka kam”.
“Wat ym khein kai ia ka rukom pyrkhat jong ka seng ba ka lah ban shah pynsngap jar ne pyntieng lyngba ki buit byrngem byrsit. Ka Seng ka dei ka Seng kaba don ia ka nongrim, ka jingkitkhlieh bad ka mynsiem ban iakhun na ka bynta ka hok u paidbah bad ka bha ka miat ka imlang sahlang” kala bynrap.
Ka kyrwoh, kaba la soi da u Environment Secretary Shining Kharbihkhiew, kala ban jur ba ka KSU ka ieng ryngkat bad ki nongshongshnong ka Daistong, Shnongrim bad kiwei ki shnong kiba shah ktah.
I aka ejahar la ujor bad u Superintendent of Police ka East Jaintia Hills District.
