Shillong, Naiwieng 09 : Ka Lympung Ki Seng Kynthei kala kyntu ia u Myntri Rangbah Conrad K Sangma ba un pynlong ia ka jingiakren bad ka Joint Action Committee (JAC) kala pyrshah ia ka Shillong Ropeway Project.
Ha ka shithi, ka Lympung ki Seng Kynthei kaba dei ka synjuk ki Seng Kynthei bapher bapher ha Shillong, kala ong ba kala ioh pdiang ia ka shithi na ka JAC ha ka 1 tarik Naiwieng, 2026, ba iadei bad ka project bad ka jingiada ia ka catchement area jong u Lum Shyllong.
Ka Synjuk ka ong “Kum ki Kmie, ngi sngewkhia jur ba kane ka project kan ktah ia ki tyllong um bad ia ka mariang”.
Kala ong ruh “Ka synjuk ka kyrshan ia ka jingiada ia ka mariang jong ngi. Ngi sngew ba kino kino ki project ne kam pynroi kiba ktah ia ka mariang kim dei ia kaban pyntrei la ka long kumno kumno ruh”.
Kala ong “Ngi kwah ban buh ka jingkyntu hakhmat ka Ophis jong phi, da ka jingkyrpad ban sngewbha pynlong ia ka jingiakren bad ki dkhot jong ka JAC, naba ia ki jingeh lah ban pynbeit tang lyngba ka jingiakren”.
Kala pynpaw ruh ia ka jingsngewkhia halor ka jingiakhih ba dang iaid myntad bad ong “Ngi sngewkhia jur ia ka jingiakhih kaba la nang pynjur”.
Ka synjuk kala ai jingmut ban thung ia ka committee da ka Sorkar ka ban don ia ki stad ki jhad na ki tnad bapher bapher kynthup ki briew kiba tip bha na ka imlang sahlang, ba kin ai jingmut kiba tei na ka bynta ban pyrkhat da kumwei pat.
