Shilong, Naiwieng 06 : U Nongialam ka Liang Pyrshah ka Khasi Hills Autonomous District Council (KHADC) bad General Secretary ka UDP Bah Titosstarwell Chyne hynne ka sngi, ula kynthoh tyngeh ia ka jingkam ka Sorkar Jylla ba ym lah ban pynkynriah ia ka Shillong Ropeway Project bad dawa ban pynim ia ka jingtyrwa kaba la lah klet ha u snem 2015-16 ban pyniasoh ia ka Mawsynram bad ka Sohra da ka ropeway.
Haba kylli halor ka jingpyrshah jur bad ka jingdawa ban pynkynriah noh ia ka Shillong Ropeway, u Bah Chyne ula ong, ba ka roi ka par kam lah ban wan lada ka ktah pat ia ka mariang bad ia ka jingim ki briew.
“Ym tang kum u nongshong shnong hynrei kum u nongmihkhmat paitbah, ngi donkam ia ka roi ka par. Ngi baroh ngi kwah ia ka roi ka par, khamtam kiban plie ia ki kabu bad ban kyntiew ia ka ioh ka kot jong ka jylla” ula ong.
“Hynrei ha kajuh ka por, ngam kwah pat ba kano kano ka roi ka par kan iapein ia ka mariang ne kan ktah ia ka jingim jong ki paitbah” ula bynrap.
Haba kylli la ia katei ka projek dei ban rah noh sha constituency ka jongu, u Bah Chyne ula pynkynmaw ba ka sorkar, ba ka Mawsynram-Sohra Ropeway kam dei satia ka jingai jingmut kaba dang thymmai.
“Nga kwah ban pynkynmaw ia phi ba ha u snem 2015-2016, ha ka sorkar jong u
Dr Mukul Sangma, kala don ka jingtyrwa ban don ia ka ropeway na Mawsynram ban pyniasoh shaduh Sohra, bad kane kala paw ruh ha ki kyndon jong ka jingmang tyngka, kaba nga lah ban ong” ula ong.
“Hynrei kaei kaba sngew lyngngoh, ka long hadien katei kala shu jah klep noh” ula ong.
“Kum u nongmihkhmat ka constituency, nga kwah ban pynkynmaw ia ka Sorkar sa shisien ba ka don ka jingtyrwa ban pyniasoh ia ka Mawsynram bad ka Sohra lyngba ka ropeway,” ula bynrap.
Ha kaba iadei bad ka jingkren jong u Myntri ka kam jngohkai ba yn ym lah ban pynkynriah ia katei ka project, u Bah Chyne ula ong “Ngam lah ban ong eiei, hynrei lada ka don ka lynti ban tei sa ia kawei pat ka projek ban pyniasoh ia ka Mawsynram and Sohra, lada ka long kaba lah ban kynthih na kawei ka seng sha kawei pat, kumta ban pynkynriah ia ka projek ruh dei ban lah” ula ong.
“La shah ban pynkynriah. Don ki khep ba ia ki projek ki bym ioh ia ka jaka la pynkynriah noh shawei pat. Ki don ki surok kiba la pyrshah, la pynkynriah noh shawei pat” ula ong.
Ha kaba iadei bad ka jingpyrshah ha Laban bad kiwei kiwei ki shnong, u Bah Chyne ula kyntait ban pynpaw ia ka rai kaba khatduh bad niat sha ki nongshong shnong katei ka thaiñ.
“Ha kaba iadei bad ka jingpyrshah ia kane ka project, nga ieh beit ha ka jingstad jong ki nongshong shnong ka Laban bad kiwei kiwei ki jaka, namar ba ka kynthup lang ia ki Rangbah Shnong, ki kmie” ula ong.
“Hynrei na ka liang ka jong nga, ngam pat buddien bha ia kane ka projek, haduh katno kan ktah. Ngam pat lah ban ai ia ka jingkren kaba thikna na ka liang ka jong nga” ula ong.
“Katba ngam pat shai bha, kaei ka jingiohnong bad kaei ka jingduhnong ha kaba iadei bad kane ka projek, ngan ym lah ban ong eiei” ula bynrap.
Halor ka jingleh jong ka KHADC ban leit khangtala ia katei ka jaka treikam jong ka Sorkar Jylla kaba iadei bad ka jingpyntreikam ia ka Shillong Ropeway, u Bah Chyne ula ong, ba ka Council mynta kadei beit ban ieng ha ka rai kaba kala shim.
“Haduh mynta, kam shim la don ka jingiakren bad nga. Hynrei ha ka jingsngew ka jong nga, haba ka District Council kala leh kumtei, ka mut ka ieng ha ka nongrim ne ka leh hadien ba kala pynshong nongrim bha” ula ong.
“Lada ka leh thurmur, kala kut noh. Hynrei lada ka leh da ka jingdon nongrim, kumta kidei ban iengskhem ha ka nongrim” ula ong.
“Kan shong ha ka EC. Haba kila leh ia kaei kaei kaba ki sngew ba ka don nongrim, ka mut kidei ban iengskhem beit ha ka nongrim” ula bynrap.
U Bah Chyne ula kren shai ruh ha kaba iadei bad ki kyndon aiñ ha kaba iadei bad ka kompani kaba pyntrei ia ka ropeway da kaba pyntreikam ia ka Trading by Non-Tribals Regulation Act.
“Nga lah dep kren ha kato ka sngi ba katkum ka Trading by Non-Tribals Regulation Act, uno uno u bym dei Khasi, kano kano ka kompani kaba kwah ban leh ia ka kam khaii pateng, leh kontrak ne trei ia kano kano ka kam hapoh u pud u sam jong ki jaka kiba hap ha ka Sixth Schedule, kidei ban shim ia ka Trading License,” ula ong.
“Kane kadei kaba shai kdar. Kaba ym donkam shuh ban iatainia” ula ong.
“Don kiba ong ba kadei ka jaka sorkar, don kiba ong ba kadei ka jaka jong ka shnong ne Syiem, hynrei nga lah dep ban kren shai ba kane ka kompani ka hap ban shim ia ka Trading License shwa ban sdang ia ka kam” ula ong.
“Lada katei ka ophis ka don ha ka jaka sorkar ne katei ka ophis kaba la shah khangtala kadei ka jong ka sorkar, kumta ka jingleh jong ka District Council ka long kaba bakla” ula ong.
“Hynrei lada katei ka ophis kadei jong ka kompani kaba nabar, ka District Council kadei ban pyni ia kata, balei ka leit ban khang tala, namar ba kam pat ioh satia ia ka Trading License” ula bynrap.
