Bthah u Bah Paul ia ki nongkynthoh ba kren mynta lane sangeh noh
Shillong, Naiwieng 05 : Ka Sorkar Jylla ka long kaba kloi ban ialam ia ki kynhun ba pyrshah ia ka Shillong Ropeway Project sha Sikkim bad Shimla ban peit dalade kumno ki ropeway ki treikam hapdeng ki jaka lum, pynbna u Myntri ka tnad Tourism Bah Paul Lyngdoh ha ka sngi Palei.
U pyntip ba kane ka jingtyrwa ka long ia baroh ki kynhun ba don bynta, kynthup ki dkhot ka Joint Action Committee Against Shillong Ropeway Project.
“Ngi long ba kloi ban iakren shuh shuh bad kine ki kynhun da kaba ialam ia ki sha ki jaka kum ka Sikkim bad Shimla, kiba don ia ki ropeway project hapdeng ki Hill Station” ong u Bah Paul.
Ula ong ba ka por ban pyrshah ia ka project kala dep kut la slem bha.
“Ka don da ka por, phi tip, haba ki briew ki iathoh shongkurim, u pastor lane u phadar u kylli hato phi don eiei ban ong mynta lane phi sngap beit jar jar ia ka shyntur baroh shirta. Un nym ong satia, la phi don kano kano ka jingujor pyrshah ia une u briew, ka briew, sa wan biang sha nga hadien saw snem. Ym don ki pastor/phadar ban ong ia kata” ong u Bah Paul.
U Bah Paul ula kynthoh ia kane haba jubab ia ka jingdawa ba ka Sorkar ka dei ban pynkynriah noh ia ka ropeway project sha Sohra lane sha kiwei kiwei ki jaka kaba ki briew ki kwah ia ka, hadien ka jingpyrshah kaba jur ha Shillong.
“Peit, kane kam dei ka kam cut-and paste, kumba phi ju leh ha ki kor computer jong phi” ula ong.
“Ka rukom long jong ka khyndew ha katei ka jaka kan iapher bad ka jinglong ka khyndew sha kiwei pat ki jaka. Ka jingbit na ka Defence Ministry ka lah ban nym donkam sha kiwei pat ki jaka. Shibun kiei kiei kin kylla lut” ula ong
U la ong ba ka ropeway kaba don ha pdeng jong ka nongbah Shillong kan kyntiew ïa ka jingshemphang jong ki nongwan jngohkai pyrthei bad kan pynkiew ruh ïa ka dor bad ka kyrdan jong ka Shillong kum kawei na ki jaka jngohkai pyrthei.
“Kine hi ki briew kiba ju ud ïa ki nongwan jngohkai pyrthei ba bam maggie da ka khot kyrteng ki ‘Maggie tourists’, ki dei ruh kijuh kiba ud pyrshah ïa ki projek ropeway. Kumno kata ka lah ban long? Phim lah ban ud ïa kawei bad ud biang ïa kawei pat,” ong u Bah Lyngdoh.
“Phi kren shaphang ka jngohkai pyrthei kaba wanrah ïa ka kamai kajih kaba heh hynrei ha ka jingwan jong ki nongjngohkai kaba duna. Kumno phi pynkiew ïa ka jingmyntoi na ka jngohkai pyrthei? Lada phi don ïa ka ropeway, ki briew kin ïoh ban mad ïa ka jingshem jong ki. Kumta ka jngohkai pyrthei hi kan long kaba pynsngewthuh bad pynmad ïa ki nongwan jngohkai. Kam dei tang ba ki wan ban leit peit ïa ki kshaid,” u la ong.
U Lyngdoh u la kyntait ruh ïa ki nia ba pyrshah ia ki five star hotel.
“Don ruh kiba kylli balei donkam ïa ki hotel five star haba ngi don ki kshaid kiba itynnad. Phim lah ban khmih lynti ba ki nongwan kai na shabar kin wanrah ïa la ki jong ki tent bad sah harud ki kshaid. Ki donkam ban ïoh ïa ka jingshakri bad ka jingshem kaba bun ha ka jngwan jngohkai,” u la ong.
Haba ïadei bad ka jingbym lah ban pynbeit ïa ka kam Trading Licence jong ka KHADC, u Bah Paul u la ong ba ka kompani ka la dep ban aplai ha ka 18 tarik Jymmang 2026, bad mynta ka aplikeshon ka dang don hapdeng ka jingpynkhreh bad bishar.
“Haba ïadei bad ki projek kiba dei trai ka Sorkar, la ju shim ba ka jingpan laisen na ka Sorkar ka long tang kum ka kam pyndep ïa ki rukom treikam,” u la ong.
U iathuh ba ia ka tala ha ka jaka ba pyntrei ia ka project lah dep ban pynpait hynnin ka sngi namar ka nongkynti ka dei jong ka Sorkar Meghalaya hapoh ka Tnad Forest.
Haba kylli la ka projek ka donkam ne em ïa ka laisen khaii, u la jubab, “Donkam, ki la dep ban aplai bad ngi khmih lynti ba kin ïoh ïa ka laisen ha kine ki khyndiat sngi ban wan. Haduh mynta, tang ki kam ban pynkhreh ïa ka project kiba la sdang, hynrei ngi sngew skhem ba ngin ïoh ïa ka laisen.”
Ia kawei pat ka jingkylli, ula ong “”To ngin shim ïa kawei ka sienjam hadien kawei. Lada lah ban pynbeit ïa kane ka kam ha ka kyrdan jong u Director, ieh kan long kumta.”
