Shillong, Naiwieng 05: U Myntri Rangbah ka Jylla u Conrad K Sangma hynne ka sngi Palei, ula plie ia bun tylli ki projek kam pynroi bad buh ruh ia u mawnongrim ban tei ia ki projek bapher ha kylleng jong ka West Jaintia Hills district, kaba kynthup ia ki surok, jaka ai jingsumar, jaka pule bad jaka ialehkai.
La synranlang ia u Conrad Sangma, da u Symbud Myntri Rangbah ka jylla u Bah Sniawbhalang Dhar bad u Myntri ka koit ka khiah bad ka kam ialehkai u Bah Wailadmiki Shylla ha kaba u Myntri Rangbah ula pynlut por baroh shi sngi ban leit jurip ia kylleng ki jaka ha kane ka district.
Haba kren ha ka jingialang plie ia ka Block Integrated Development Complex ka Thadlaskein C&RD Block, ia kaba la plie ryngkat lang bad u nongialam shnong u Bah Kwit Sari, u Myntri Rangbah ula pynpaw ia ki 3 tylli ki paia jong ka sorkar ha ka rukom pyntreikam ia ki kam pynroi.
Ki paia kiba nyngkong ki pynleit jingmut halor ki jingtei, kynthup ia ki surok, skul, ki jaka ai jingsumar bad ki jaka ialehkai.
U Sangma ula ong ba jan kumba 70 percent jong ka jingpynlut ka sorkar kadei ha ka liang ialehkai ha ki katto katne snem kiba la dep bad kadei kaba la bthah ban tei ia ki jingtei bapher bapher.
Ki paia ki baar, kidei na ka bynta ka bha ka miat jong ki riewshimet bad ka jingai jingiarap ia ki.
U Myntri Rangbah ula ong kumba T.400 Klur lah dep ban phah sha ki khynnah pule lyngba ki prorkam Scholarship ki bapher bapher. Ka jingai jingiarap da ka pisa ia ki Self-Help Group kala kiew na ka T.50 Klur shaduh kaba jan kot ia ka T.1,400 Klur, katba ki nongrep kila ioh pdiang jan kumba T.300 Klur lyngba ki scheme kum ka FOCUS+ bad CM ASSURE.
U paia balai, ula ong u pynleit jingmut ha kaban pynneh pynsah ia ka jinglong tynrai, kolshor, ki jingleh tynrai kiba naduh mynshwa hapdeng ki jaidbynriew bapher bapher jong ka Meghalaya, khlem da kheiñ ia ka jingngeit ne ia ka thaiñ.
Ula banjur ruh ia ka jingdonkam ban kynthup lang ia ki khlieh nongsynshar bad ia ki nongialam shnong ha ki sienjam kiba shim da ka sorkar ha kaba iadei bad ki kam pynroi.
Ha ka liang ka koit ka khiah, u Sangma ula buh ia u mawnongrim na ka bynta ban tei ia ka hospital 100 jingthiah ha Ummulong, ha ka jinglut kaba kot T.53 Klur. La buh mawnongrim ban tei ia ka Sub-Centre ha Ialong, Sabahmuswang bad Ksehrynshang, katba la plie paitbah pat ia ka Madur bad ka Lad Mukhla Sub-Centres.
Ha ka pule puthi, la plie ia ka jingtei ia ka iingskul jong ka Government Girls Higher Secondary School, Jowai bad la buh ia u maw nongrim ban tei ia ka iingskul bathymmai jongka Lower Primary School ha Mukhla Sohshrieh, Niriang bad Mokaswan.
Hapoh jong ka PWD (Roads), Jowai South Division, la plie paitbah ia ka jingshna ia ki surok, jingshna pynbha bad ki kam kiba iadei bad ka jingkyntiew kyrdan kaba kot haduh 38.163 Km ha kylleng jong ka thain Jowai, Madur Thymme, Mukhla bad Niriang.
U Myntri Rangbah ula buh mawnongrim ruh na ka bynta ka 2.450-km Sabah Muswang ka surok shnong hapoh jong ka RIDF-XXX bad ia ka surok kaba 4.085 km ha Khliehtyrshi hapoh jongka RIDF-XXXI. La buh ruh ia u mawnongrim jong ka jingker ia u pud u sam jong ka Thomas Jones Synod College, Jowai.
Katto katne ki projek kiba iadei bad ki jaka ialehkai, la shimkhia ha katei ka jingleit jngoh jong u Myntri Rangbah, kynthup ia ka Aquatic Complex ha Jowai, ka Athletic Synthetic Track ha Kiang Nangbah Stadium bad ka Artificial Football Ground ha Mukhla Sohshrieh.
Kiwei pat ki projek ki kynthup ia ka jingkyntiew ia ka stadium ialehkai football, VIP Gallery, ka jingker ryngkat bad ka jingtei ia ki kynroh ha Mukhla Sohshrieh, Mukhla Umlangshor bad Madan Thad Mukhla.
U Myntri Rangbah ula plie ruh ia ka Kiang Nangbah Stadium kaba lah dep ban shna pynbha, ka Shooting Range ha Khliehtyrchi. Ula pynkup burom ruh ia Pritam Sunar bad Sawakani Lakiang halor ka jingjop ka jongki kaba dang shen.
Ha katei ka prokram la, la sam ruh ia ki tiar ki tar sha ki 181 ngut ki nongioh jinghikai pyntbit lyngba ka District Skill Development Office bad la aiti ruh ia ki Maternal bad Child Care Kits sha ki nong ioh jingmyntoi.
U Conrad Sangma ula leit ruh ban jurip ia ka Iawmusiang Shopping Complex bad ia ka Thadlaskein Hospitality Complex.
