Shillong, Naiwieng 4: Ha ka jingwanrah ia ka jingkylla ha kaba iadei bad ka rukom bei tyngka ia ki skul, ka Sorkar Meghalaya kala pynduh noh ia ka jingbhah kaba thymmai na ka bynta ka tulop nonghikai katkum ka Grant-in-Aid sha ki skul shimet bad kala pyniaid noh da ka jingpynmih kaba thymmai kaba iadei bad ka skhim – CM-IMPACT PLUS.
Ka jingshimkhia u Myntri Rangbah ban pyntreikam ia ka Maximize Pass Achievement and Classroom Triumph PLUS Scheme kadei kaba la pynbna paitbah ha ka sngi Blang da u Commissioner and Secretary ka Tnad Pule Puthi u Vijay Kumar Mantri.
Ha ka jingpynbna paitbah la ong, ba ka sorkar kala pynwan hajuh ia ka tulop jong ki nonghikai, lait noh tang ia kiba don ha ka Deficit ha ka Structured Pay Framework, kala pynsangeh ia ka jingai thymmai ia ka tulop lyngba ka Grant.
Kala pynpaw ba ka jylla kala don tang khyndiat tylli ki Secondary School bad Higher Secondary School haba ianujor badk aj ingdon ia ki Lower bad Upper Primary School bad ki jingkyrshan paitbah kidei ban bthah ban pynkhlain ia ki bynta jong ka Secondary da kaba ai khusnam ia ka jinglehbha bad jingdonkam.
Hapoh jong ka scheme, ki Private Secondary bad Higher Secondary School kin ioh ia ki jingiarap (Recurring Assistance) ban weng ia ki jingeh ha kaba iadei bad ka jingioh bad ka jingpynlut, ki Private School kiba pan jingiarap ban kyntiew kin ioh ia ka jingiarap kaba shisien (one-time assistance) bad ki Government Secondary bad Higher Secondary School kin ioh ia ka jingiarap kaba shisien ban tei ia ki jingtei (one-time infrastructure grant).
Ka Sorkar kala ong, ba ka kwah ban pynshlur ia ki skul shimet ban treikam na ki jaka kiba biang kiba donlang ia ki madan ialehkai bad ki jingtei, ban kyrshan ia ka jingkyntiew ia ki jaka pule kiba leh bha na ka Upper Primary sha ka Secondary bad Secondary sha ka Higher Secondary, ban pynshlur ia ki skul ha ki thain nongkyndong bad ha ki jaka kiba don sha jngai bha bad ban pynbha ia ki jingtei jong ki skul sorkar.
Ia ka scheme yn pyntreikam da ka State Education Mission Authority of Meghalaya (SEMAM) bad bhah pat da ka Apex Committee kaba la khlieh da u Myntri Rangbah.
Ka jingai jingiarap lyngba ka Recurring kan long T.10 lak ia ki Secondary bad T.12 lak ia ki Higher Secondary ha ka shi snem, kaban kiew na ka 60% sha 120% katkum ka MS-PGI Grade, SSLC bad HSSLC Pass Percentage, ka jingdon ki khynnah pule, ka jingmih na ka jingsiew, ki kyrdan ha nongkyndong bad ha ki jaka kiba jngai, ka jaka lajong bad madan ialehkai bad ka Composite Status. Ha kano kano ka dur yn ym lah ban ai ia ka Grant kaban long palat ha ka jingioh-jingpynlut.
Ka jingpynbna kala pynshai ruh ba ka Grant kam dei satia ka tulop ne ban thaw ia kano kano ka hok ban shim ia ki nonghikai sha ka kam sorkar. Ki School Management Committee kiba kwah ban pynkylla ia ka Sanctioned Teacher Post sha ka Composite Grant lah ban pdiang hapoh jong katei ka scheme.
Ka jingai jingiarap ia ka Grant ban kyntiew (One-Time Upgradation Grant) kan kynthup ia ki jingtei bad ia ka “Limited Transitional Recurring Support na ka bynta 3 snem, katba ia ki Grant na ka bynta ki skul sorkar yn pyndonkam thik tang na ka byntya ban maramot ia ki jingtei, painkhana, jaka dih um, ki jaka iaid bad ki jingshngain ha kaba iadei bad ka bording elektrik, dei ban pyllait ha ka 40:40:20 kaba iadei ruh bad ka jingiaid ka kam.
Ka Scheme kan treikam hapoh jong ka Grant-in-Aid Budget kaba mynta kaban ym don kano kano ka ‘Separate Fixed Outlay’ bad Grant kin dei kiba lah ban shah pynduna, shah suspon ne jingpynphai biang lada jia ba ka don ka jingai ia ki jingtip kiba thok, ka jingpyndonkam bakla ia ka pisa ne ka jinghiar ia ka resol.
