Shillong, Naiwieng 04 : U Nongialam bad MLA ka BJP Bah Sanbor Shullai ha ka sngi Balang ula ong ba ka BJP kala shah let klet ha ka jingpynkylla ia ka kynhun Myntri bad ba ka NPP ka khlem iasyllok bad ka paralok kaba wan ba-ar ha ka jingbun paid ha kane ka jingpynkylla.
Ha ka kyrwoh, u Bah Sanbor ula bat ruh ia ka kam Myntri ha ka Sorkar, ula ong ba ka BJP kaba don 10 ngut ki MLA, ka don hok ban ioh shuh shuh ia ka shuki Myntri, ka jingdawa kaba la dep pynsngew ha u Myntri Rangbah hadien ka jingiehnohkam u President ka UDP Bah Metbah Lyngdoh.
U Bah Sanbor ula ong ba ka BJP kam don jingpyrshah ia kino kino ki MLA ka NPP ba shah thung kum ki Myntri, hynrei ka BJP kum ka party kaba wan ba-ar ha ka jingbun paid, lah dei ban burom.
“Ka BJP ka ju ieng ryngkat beit bad ka NPP wat ha ki por ba jynjar naduh u snem 2023 haba baroh ki seng sain pyrthei ki kwah ban thaw ia ka Sorkar synrop ba khlem ka NPP” ula ong.
U ong ba katba ka Sorkar MDA ka ioh ia baroh ki jingiarap bad jingkyrshan na ka BJP na Delhi, ka jing bym niewkor ia ki MLA ka BJP da ki nongialam ka NPP kam dei ka dak kaba bha ia ka jingiatreilang.
U Bah Sanbor ula iathuh ba ki MLA ka BJP ha ka sngi Balang kila iakynduh ia u Northeast co-incharge Rajiv Babbar bad pyntip ha u shaphang ka jinglong jingman ka sain pyrthei mynta bad kumno ba ka BJP kala shah leh lyndet ha ka jingpynkylla ia ka kynhun myntri bad ka jingsam bhah kam.
U iathuh ba ia kane ka kam yn sa rah iakren bad ki nongialam na Delhi shuwa ban shim ia kano kano ka rai.
U nongialam ka BJP ula iathuh ba ula dep iakynduh ia u Myntri Rangbah bad ia baroh arngut ki Symbud Myntri Rangbah halor ka jingbthah ka Sorkar bad kyrpad ban pynlong ia ka jingialang bad baroh ki MLA ka BJP ha kaban pynbeit ia kane ka kam da ka jingiasngewthuh jingmut.
