Donkam palat ia ka jingkyrshan ki nongshongshnong
Shillong, Naiwieng 04 : Ka National Games ha u snem ban wan kan dei ka lympung ialehkai kaba heh duh ban pynlong da ka Meghalaya ha kine ki 54 snem bala leit noh, ong u Myntri Rangbah Conrad K Sangma ha ka sngi Balang.
Ula kren ia kane ha ka jingplie ia ka District School Education Office-cum-Multilevel Car Park ha Mawkhar bad ka Multilevel Car Park ha Motphran.
U Conrad ula ong ba ka Sorkar Jylla kala pynkhreh na baroh ki liang ban pynlong ia kane ka lympung ialehkai kaba kongsan bad ka Organizing Committee ka Indian Olympic Association (IOA) kala don ha Shillong ban iakren halor ki jingpynkhreh.
“Kane ka long ba kane ka dei ka lympung bah eh duh kaba ka Meghalaya kan pynlong ha kine ki 54 snem bad kumta, ka long ka khyllipmat kaba kongsan eh ia ngi. Ngi la pynkhreh bha na baroh ki liang. Ka Organizing Committee na ka IOA kala don ha Shillong mynta ban iakren ia baroh ki jnit ki jnat bad ka Sorkar Jylla” ula ong.
Haba khot ia ka jingiatreilang jong baroh, u Myntri Rangbah ula ong “Kane kam dei tang ka lympung ialehkai ka Sorkar hynrei ka dei jong ka Jylla Meghalaya baroh kawei. Man ki nongshongshnong ki don ia ka bynta ban leh, baroh khot ki don ia ka synniang ban hap leh”.
Ula bynrap “Wat lada ngi lah ban pyni ia ka durkhmat ba phuh rkhie bad pdiang ia ki nongwan sngewbha da ka mynsiem ba kylluid, kane kala dei ka synniang. Ka jingshimkhia ia ki nongialehkai kiba wan na shabar, bad pynlong ia ki ba kin sngew ba ki don hala iing, pyni ha ki ia ka jingitynnad ka kolshor bad ka jingpdiang sngewbha, kane ka dei ka synniang kaba man iwei pa iwei na ngi ngin leh”.
U Conrad ula iathuh ba ka Sorkar ka dang ap ia ka jingbuh tarik jong u Myntri Rangbah Duh ia kane ka lympung, kaba lah ban long ha u bnai Lber, bad pynpaw ia ka jingsngewskhem ba kan long kaba sah jingkynmaw.
