Shillong, Naiwieng 3: Ka Madan Polo ha ka 12 tarik u Nohprah, kan shlei da ki paitbah kum ka jaka ban pynlong ia ka jingmane, haba ka kynhun rwai niam na Germany kaba la ioh ia ka khusnam Grammy Award, ka Maverick City Music kan kiew ha ka rynsan ha Shillong na ka bynta ka Gospel Concert kaba heh kum ka jingrakhe bad jingpynkhreh lypa ia ka Christmas.
Ia kane la pynbna hynne ka sngi Baar da u Administrative Secretary ka KJP Assembly Rev S Diengngan, ula ong, ba kane ka Concert kadei kaba pynlong da ka KJP Assembly lyngba ka Mission and Evangelism Department ryngkat ka jingkyrshan jong ka Sorkar Meghalaya bad ka jingiatreilang bad ka Rocksii EMG.
“Ka long ka jingkmen kaba khraw bad ka jingsngewnguh ia u Blei ba ka KJP Assembly ka sngewbha ban pynbna ba kan pynlong ia ka Gospel Concert kaba heh kaba la ai kyrteng ‘Maverick City Music, Live in Shillong’ ha ka 12 tarik u Nohprah 2026 ha Madan Polo, Shillong” la ong u Rev Diengngan.
Ia ka Meghalaya, kan long kum ka jingwanphai iing ia ka Gospel Concert kaba heh. Ka jylla ha ki snem kiba mynshwa kala pynlong ia ki Gospel Concert ha kaba la wan da ki nongrwai bad ki kynhun rwai nabar ri kum u Bob Fitts, Petra bad Don Moen bad mynta kan pdiang sngewbha ia ka kynhun rwai kaba pawnam ha ka pyrthei kaba na Atlanta, Georgia.
Ka Maverick City Music kadei kaba la pawnam bha ha ka jingpynmih ia ki jingrwai niam kiba sngewtynnad bad kane ka kynhun kala jop bun tylli ki Grammy Award, kynthup ia ka Old Church Basement with Elevation Worship, Breathe, Kingdom Book One and Fear Is Not My Future, nalor kane artylli ki GMA Dove Award. Ha u snem 2022, kala kylla long ka kynhun rwai khristan kaba nyngkong eh ha ki 20 snem ban rwai ha ka rynsan jong ka Grammy Awards bad ka “Jireh”.
U Rev Diengngan ula ong, ba kane ka Concert kan ai ia ki paitbah ka Meghalaya ia ka kabu kaba kyrpang ban sakhi da la ki jong ki khmat ia kane ka kynhun rwai kaba pawnam ha ka pyrthei, ban iawanlang ha ki tem ka put ban iaroh ia u Blei bad ban mad ia ka jingshemphang jong kane ka kynhun rwai kaba la ioh ia ka sap kaba kyrpang.
Yn pynlong ia kane ka Concert kum shi bynta jong ka jingpynkhreh ia ka Christmas, ban pynkhreh ia ki mynsiem ban pdiang ia ka aiom jong ka jingwanphai jong ka jinglehkmen sa shisien biang sha ki jaka rilum bad ban pynmih pisa na ka bynta ka KJP Assembly kaba trei ia ki kam bapher bapher ha kylleng jong ka Jylla.
La buh dor bai a ki tiket yn die ha ka dor T.1,000 na ka bynta ka Silver, T.2,500 na ka bynta ka Gold bad T.10,000 ia ka Patron’s Lounge bad lah ban thied Online ia ki tiket lyngba ka ROCKSKI TICKETS.COM. Kiba noh synniang ne Donors kiba noh synniang T.10,000 bad shajrong kin ioh pdiang ia ka sertiphiket kaba la soi da ki nongrwai bad ki nongtem.
U Rev Diengngan ula kyntu ia ki paitbah ka Meghalaya bad kiba na kiwei pat ki jylla ban wan sha kane ka concert bad ula kyntu ruh ia ki Balang, Pastor bad ki nongsharai balang ban pynshlur ia ki dkhot ki jongki khamtam ia ki samla, ki longkmie bad ki rangban ban iadonbynta lang ha katei ka prokram.
Ula pynpaw ia ka jingkyrmen ba kito baroh kiba wan sha kane ka Concert kin iai sah jingkynmmaw bad kin ioh ruh ia ka jingkyrkhu jong u Blei lyngba kane ka Gospel Concert.
