Shillong, Naiwieng 03 : Satang shisnem duna ban long ka 39th National Games 2027 ha Meghalaya, ka Games Techical Conduct Committee kala wan poi ha Jylla ban peit dalade la ka Meghalaya ka long kaba la khreh ne em ban pynlong ia kane ka lympung kaba heh duh ka ri India.
Ia ka jingwan jurip ba 4 sngi, naduh ka 2 tarik haduh 5 tarik Naiwieng, la ialam da ka Chairman ka GTCC Sunaina Kumari, ha ryngkat ka jingsynran ki dkhot Ravinder Choudhary, Maninder Pal Singh, V Sunil Kumar bad Dushyant Sharma.
Ka jingbishar kam kala sdang ha ka sngi Nyngkong ha State Guest House ha Taraghar, ha kaba ka Tnad Sports & Youth Affairs kala pyni ia ki plan hakhmat ka Committee.
U Commissioner and Secretary Vijay Kumar D, IAS, ula ialam ia ka kynhun na Jylla, ha ryngkat ka Secretary Kong Isawanda Laloo, IAS, Joint Secretary Richard Yanthan, Director Alertson Nongbri, MCS, Deputy Director Paia B War Nongbri bad In-charge Chief Engineer ka State Sports Council ka Meghalaya Phrangki Pale.
U Working President ka Meghalaya State Olympic Association Bah John F Kharshiing, Vice President kong Matsiewdor War Nongbri, IAS (Retd), bad General Secretary Bah Finely L Pariat kila iadonlang ha kane ka jingialang.
Ka GTCC hadien kane kala pynlong ia ka jingiasyllok online bad kiwei pat ki Jylla ka thain Shatei Lam Mihngi ki ban pynlong lang ia kane ka lympung, hashuwa ban kren halor ka ACT bad ki jingpynkhreh.
Hadien kane, ka Committee kala mih ban leit jurip ia ki madan ialehkai kiba kynthup ia ka JN Sports Complex , basketball ha Integrated Multipurpose Indoor Hall, football ha Shillong Sports Association ground, golf ha Shillong Golf Club, rugby, fencing bad boxing ha Sports Authority of India centre, bad mountain bike cycling ha NEHU Campus.
Ka jingjurip kan biang ha ka 4 tarik Naiwieng, ha kaba ka Committee kan shong bishar ia ki kor technical bad leit jurip shuh shuh ia ki jaka ialehkai ha Shillong bad Jowai.
