Shillong, Risaw 30: Ki nongshna tiar bad ki nong shong shnong naki 11 tylli ki shnong na kylleng ka jylla Meghalaya kin pyni ia ki kam shna tiar nala tynrai, ki rukom shna jingshna bad ki jingtip tynrai jong ki ha ka tamasa Living Heritage Arts and Crafts Villages Festival kaba ar sngi ka ban long ha Shillong ha ka 3 bad 4 tarik Naiweng 2026.
Ia kane ka tamasa yn pynlong da ka tnad Arts and Culture jong ka sorkar Meghalaya hapoh ka Jan Jatiya Gaurav Divas (JJGD) bad iaka Living Heritage Arts and Crafts Villages Festival yn plie paidbah haka 3 tarik.
Kane ka jingïalang ka thmu ban wanrah ïa ki nongshna bad nongthain kti naki shnong jong ka Meghalaya sha ka rynsan ban pyni nam iala ki sap, ban pynphriang iaki mar ba la shna da ka kti, ban pyni ïa ki buit shna kti tynrai bad ban batai ïa ka jingdonkam jong ka kolshor ha ka kam jong ki.
Ki nongwan jngohkai kin ïoh ruh ka lad ban ïakynduh bad ki nongshna bad nong thain kti bad ban tip kumno ki sap bad jingstad tynrai ki ïaid lyngba ki pateng, ban pynneh pynsah ïa ki jingim jong ki nongshong shnong kaba dei ruh ka sienjam ban pynim ïa ki riti dustur jong ka jylla.
Ka tamasa ka buh ïa ki jaitbynriew trai ri ha pdeng jong ka jingrakhe, da kaba ithuh ïa ka jingnoh synñiang jong ki ban pynneh pynsah ïa ka kolshor bapher bapher jong ka Meghalaya hapdeng ka jingkylla ha ka imlang sahlang bad ka ioh ka kot.
Ka tnad Arts and Culture ka la khot sngewbha ïa ki paidbah ban wan sha kane ka tamasa bad ban ïashim bynta bad ki kam shna jingshna, ki mar bad ki jingstad tynrai jong ki shnong kiba ïashim bynta.
