Shillong, Risaw 29: Da kaba ong ba ka jingwan pyniasoh kadei ka jingleit phai biang sha la iing, u MLA barim ka UDP na Mawkyrwat u Bah Renikton Lyngdoh Tongkhar ha ka sngi Balang ula ong, wat kiba don ha ka Liang Pyrshah kila kubur ba ka Sorkar NPP kadei kaba biang tam ha kaba iadei bad ki kam pynroi.
U Bah Tongkhar ula pyniasoh sha ka NPP ryngkat lang bad u Bah Paul Lyngdoh bad u Bah Nujorki Sungoh.
“I Pa jong nga i lah don palat 80 snem ka rta hynrei i don hangne ban kyrshan ia ka jingwan pyniasoh ka jong nga, ryngkat bad ka kurim jong nga, ki hynmen bad para kynthei bad shynrang ki jong nga bad baroh ki khun ki jong nga” ula ong.
Halor ki jingkylli halor ka jingkynriah seng noh ka jongu, u Bah Tongkhar ula ong, “Ngi lah ban don ia ki daw ki bapher bapher hynrei ngi ia long pat kumjuh ha ka jingshim ia ka rai ban pyniasoh sha ka NPP – ma Nga, Bah Paul Lyngdoh bad Bah Nujorki Sungoh. Nga lah shong hangne naduh u snem 2012, u Myntri Rangbah ula pyni ia nga ia ka dur ha u snem 2012, kata hi kadei ka jubab kaba khraw tam. Ia nga ka jingwan pyniasoh sha ka NPP kam don eiei hynrei kadei ka jingwan phai biang sha la iing”.
“U Blei ula ialam ia ka lynti kumta nga la ioh ia ka lad ban don biang bad ka NPP mynta ka sngi. Nga shu kwah ban ong ia u Myntri Rangbah, ngi lah iadonlang ha ki por kiba sniew bad nga dei hok ban iadonlang ruh ha ka por kaba bha. Nga sngewkmen bha watla kala shim por katto katne snem ia ngi, hynrei ngi lah ioh ia ka lad mynta ka sngi ban iakynduh biang ha ka iing ka sem jong ka NPP” ula ong.
Haba iaroh ia ka rukom ialam, ula ong, “Nga ngam don hangne ban pynrem ia kiwei pat ki nongialam na kiwei pat ki seng saiñ pyrthei, ki don ia la ka jong ka kyrdan bad ia la ka jinglah, hynrei ngi lah iohi pat ia ka jinglong nongialam ha ka seng NPP. Haba nga peit ia baroh 3 ngut ki nongialam u Myntri Rangbah u Conrad K Sangma, ki Symbud Myntri Ragbah u Bah Prestone Tynsong bad u Bah Sniawbhalang Dhar, nga iohi ia uwei u briew uba khlain uba don ia ka jabieng kaba shemphang bad uba don ia ki artylli ki tyrpeng kiba khlain uba lah ban kit ia kano kano ka jingkhia”.
“Kila don ki hamasaia ba ka NPP ka lah ban pait ban pra, nga ong ba kan ym jia eiei tad haduh ba kine ki 3 ngut ki nongialam kin don ia la ka jong ka rukom pyrkhat bad ia ki jingsngew. Yn ym don kiban lah ban pynpait ia ka NPP, katba ka dang don ka jingiatylli kaba skhem mlon hapdeng kine ki 3 ngut, ka NPP kan iai neh kum ka seng kaba khlain bha” ula ong.
“Phin kyndit ba wat kiba don ha ka Liang Pyrshah ki ong, lada ngi iakren ia ki kam pynroi, kane ka sorkar kadei ka sorkar kaba biang tam” ula bynrap.
U Bah Tongkhar ula ong, ki kam pynroi kidei ki dawbah kiba la pynlong ia u ban shim ia ka rai bad ka kyntu ia ki samla ban sakhi ia kane.
“Ka kam Politics kadei na ka bynta ban wanrah ia ki kam pynroi bad ia ki jingkylla. Ki nongialam ym tang ma ngi ki 3 ngut hynrei hashwa ka jong ngi ruh kila jied ban rung sha ka NPP namar ki kam pynroi kiba ngi lah iohi da la ki jong ki khmat. Nga kyntu ia ki nongshong shnong kiba dang samla ban kin leit sha kylleng ka Meghalaya ban peit ia ki kam pynroi ha man la ki kyndong kynshrot. Ia ka Khasi-Jaintia, leit sha New Shillong bad sa peit haduh katno ki jingkylla kila jia. Bun ki bym ju leitkai ne shang ha kylleng ki jaka ki ong, ngi long hi kumjuh” ula ong.
“Ka Mawkyrwat ruh kala iohi ia kiba bun ki kam pynroi bad dei na kane ba nga lah don hangne mynta ka sngi bad bun shuh shuh kin dang wan” ula ong.
