Shillong, Risaw 28: Kum ka dak ban kynmaw burom ia i Mei-ieid Spility Lyngdoh Langrin kum ka riewshlur kaba kyntait ia ka song T.45 Klur ban iada ia ki jaidbynriew, ka Khasi Students’ Union (KSU) ha ka sngi Balang kala dawa ba ia ka Resolution bala mynjur hapoh ka iingdorbar thawain̈ ka jylla bad District Council kam dei ban shu kut tang ha ki kot ki sla hynrei ban pyntreikam pura ha kaban pynthikna ban nym ailad ban tih ia une u marpoh khyndew.
Haba kynmaw burom ia ka lyngkhuh sngi iap kaba 6 jong I Mei-ieid Spility kum ka sngi pyrshah tih Uranium ne ka “Anti-Uranium Day”, ka KSU kala ong ba i Mei-ieid Spility Lyngdoh Langrin ila long kum ka nongmuna jong ka jingshlur, jingskhem jingmut bad ka jingieid shisha ia ka Ri bad Jaitbynriew.
