Shillong, Risaw 28: Da kaba kdew ïa ka jingma kaba ap ïa ka jingkieng Umiam ba dang shu shna thymmai namar ka jingiaid ki trok ba kit palat pud, ka Hynñiewtrep Integrated Territorial Organisation (HITO) ka la dawa naki bor ba dei peit ban buh noh mardor daka Weigh Bridge ban thew iaka jingkhia ki trok ba iaid kum ka sienjam ban iada iaka Jingkieng.
Ha ka dorkhas sha u Commissioner ka tnat Transport, ka HITO Ri-Bhoi ka la ong ba ka Weigh Bridge ka long kaba donkam bha ban pyntreikam ia ka kyndon ba la pynbna ba tang ki kali kiba kit 28.5 metric ton kin lah ban iaid naka jingkieng.
Ka la kdew ba watla la don jingthoh ba kdew ba ki kali kidei ban kit jingkhia katkum bala buh hynrei hynrei ym don kano kano ka lad ha ka jaka ban pynshisha ia ka jingbud ryntih ki kali.
“Tang ka jingpeit bniah da ki khmat kam lah ban pynthikna ba ki Trok ki kit jingkhia katkum bala buh la kadei ka kali kaba kit ia u dewiong, maw, shyiap, dewbilat ne kiwei kiwei ki mar. Khlem ka Weigh Bridge ki bor synshar kim lah ban shim khia pyrshah ia ki nongpynkhein ain,” la ong ka HITO.
Ka la ong ba ki kali kit mar kiba la kit palat pud ki lah ban pynsniew ia ka jingkieng bad buh jingma ia ki nongleit nongwan.
Haba kdew iaka jingpynbna paidbah jong ka tnad Transport ha ka 20 tarik Jymmang 2026 halor ka jing Modify khlem jingbit iaki kali kit mar, ka HITO ka la ong ba ka jingpynshisha ïa ka jingkhia kaba treikam kan pynkhlain ïa ka jingpyntreikam baroh kawei.
Ka seng ka la dawa hynniew ban pyntreikam iaki tylli ki mat jingdawa, kynthup ïa ka jingmynjur na ka bynta ka Weigh Bridge, haki jaka bala ithuh kyrpang, ka jingbuddien lang da ka tnad Transport, ki bor pynïaid District, ki pulit pynïaid kali, DTO bad ka jingpynshitom kaba tyngeh pyrshah ïa ki kali kiba kit palat pud.
Kum ka sienjam ba shipor, pud ka HITO ka kyntu ban pyndonkam ia ki Mobile ne ki Weigh Bridge ba shi por haduh ban da mih ka Weigh Bridge ba pura.
Ka HITO ka la ong ba ka jingdawa ka long na ka bynta ka jingmyntoi paidbah ym ban khanglad ia ki kali kit mar kaba long katkum ka ain, da kaba kyntu ia ka sorkar ba kan leh mardor shwa ba kan jia kano kano ka jingpynjot iaka Jingkieng Umiam.
