Shillong, Risaw 27 : U Nongialam ka NPP bad Myntri Sorkar Bah Wailadmiki Shylla ha ka sngi Ba-ar ula ong ba ka party ka kyndit halor ka rai jong u State President barim Dr WR Kharlukhi ban kyrshan ia u kyrtong ka Congress Bah Vincent H Pala ha ka elekshoh shiteng samoi ka Shillong Lok Sabha, hynrei ula pynpaw ba ka dang kloi palat ban batai ia ka jingktah jong ka.
“U Dr Kharlukhi ula dei u nongialam bala rim bha jong ka party, ula don bad ka party la slem bha naduh ka por ba dang don u nongseng (L) PA Sangma. Khlem pep kala wan kum ka jingkyndit ia ngi, hynrei ia mynta ngam lah ban kynthoh eiei la kan don jingktah ne em ia ngi. Ngin hap ap bad peit” ong u Bah Wailad.
Haba kynthoh ia ka jingkam u Dr Kharkulhi ba u ai ka jingkyrshan halor ka kam FCRA, u Bah Wailad ula ong ba ka NPP kala iakren khlem sangeh ia kane ka kam bad ka Sorkar Pdeng.
“U Myntri Rangbah jong ngi ula ialam ia ka kynhun bad nga dei ban ai khublei ia ka Sorar Pdeng ba halor ka jingkyrpad jong ngi, kila pdiang ia u MP ka Rajya Sabha jong ngi ban long u dkhot ha ka FCRA Committee. Ngi la kren bha halor kane ka kam naduh ka sngi ba nyngkong bad ngi dang iakren haduh mynta bad ka Sorkar Pdeng” ula ong.
Ula pynpaw ba u Dr Kharlukhi ula pynshau b aula kyrshan ia u Bah Pala kum u kyrtong, ym ia ka congress party.
“Ha Meghalaya, ki briew ki ai ka jingkyrshan ia u kyrtong, ym ia ka party. Da ki khep ha ka elekshon MP, ki kyrshan ia uwei u kyrtong, ha ka MLA ia uwei bad MDC ia uwei pat. Kumta ba ngan kynthoh mynta ka long kaba dang kloi palat” ong u Bah Wailad.
Halor ka jingialap elekshon jong u kyrtong ka NPP Dr DRL Nonglait, u bah Wailad ula ong ba ka jing wan jong u paidbah ka long kaba ihun shisha.
“Man ki jaka ba u kyrtong jong ngi u leit ialap elekshon, dang ha ka taiew bala lah ha Jowai phi la iohi ia ka jingwan u paudbah wat hapdeng ka aiom ot. Wat mynta ka sngi ha Umroi, ka jingwan u paidbah ka long kaba bun bha. Ka jingkyrshan kala nang kiew na ka sngi sha ka sngi” ula ong.
Halor ka manifesto ka party, ula ong ba ka party kan sa pynlait shen.
