Shillong, Risaw 27: Ka Jylla Meghalaya kadei kawei napdeng ki Jylla kaba jur ka jingpang HIV bad AIDS kaba la pynkhuslai ia ka ri da ka jingkiew jong ki briew kiba ioh ia kane ka jingpang man la ka snem, la ong u Myntri Rangbah ka Jylla u Conrad K Sangma ha ka sngi Baar.
Haba kren ha ka State-Level Red Ribbon Youth Festival 2026 kaba la pynlong da ka Meghalaya AIDS Control Society.
“Ka Meghalaya kadei kawei napdeng kiba jur bha ne kaba jur bha hapoh ka ri ha kaba iadei bad ka HIV bad AIDS. Ka nombar kala iai kiew man la ka snem” la ong u Sangma.
U Myntri Rangbah ka Jylla ula maham ba ka jingpynslem ha kaban shimkhia mardor ka lah ban nang pynsiew shuh shuh ia ka jinglong jingman bad ka ong ban tehlakam ia kane kam dei satia tang ka kam ban leh marwei hi da ka sorkar.
“Kam dei tang ka AIDS Control Society ne ka Tnad ka Koit ka Khiah ne ka Sorkar. Kadei ka jingkitkhlieh bad ka jingiashimbynta lang jong baroh ki nongshong shnong kiban iarap ia ngi ha kaban tehlakam. Lada phim shim ia ki sienjam mynta, kane ka jinglong jingman ka lah ban long kaba kham jynjar shuh shuh” ula ong.
Haba kren halor ki sienjam jong ka sorkar, u Sangma ula ong, “Ngi lah rai ban don ia ka Mission na ka bynta ki 5 snem ban wan, ha kaba T.25 Klur yn pynlut da ka Sorkar Jylla bad lada donkam ngin pynlut shuh shuh”.
Ula ong, ba ka sorkar kala sdang ïa ki prokram bapher bapher ban ïakhun pyrshah ïa ka jingdih drok, kaba iasoh ruh bad ka jingsaphriang ka jingpang HIV.
“Ngi don ia ka buit treikam, ngi don ia ka pisa bad ngi don ruh ia ki kor teknoloji, ka jingai ia ki dawai (antiviral medication) kaba donkam ban tehlakam ia u khniang jingpang bad ban pynthikna ba yn nym pur. Lada ai jingsumar thikna, un lah ban tehlakam bad pyntlot bor ia u khniang jingpang” ula ong.
U Sangma ula ong, ka jingpynleit jingmut mynta kadei ban poi shaduh ki jaka kiba don ha kyndong kynshrot ban pynthikna ba ka jingkhmih bniah ne Testing bad ka jingiai bteng ban ai jingsumar bad ban pynpoi ia ki dawai dashin ha ki iing ki sem bad ban leh ia ka Testing salonsar ia ki paitbah.
“Ki ophisar ki jong ngi ha ki district ki don ia ka bynta kaba kongsan bha, la kadei u District Officer in-charge ka HIV bad AIDS, ne u Deputy Commissioner, ne ki sengbhalang kiba trei ha ki district ne skul, college. Ka Sorkar bad ki bor baroh ki jongka ki dang trei ia ka kam halor katei” la ong u Sangma.
Ula ong, ba ka jingseisoh jong ka 95-95-95, ka jingithuh, jingsumar bad ka jingpyntlot bor ia u khniang kan shong eh ha ka jingiatreilang bad ki paitbah.
“Ka kyrwoh ka long, ba kam pher lada Test bad kam lei lei ruh lada long ‘Positive’ ne ioh ia ka jingpang ka don ka jingsumar. Kam lei lei ruh ban leit ban ioh ia ka jingsumar bad ban pan ia ka jingiarap” la ong u Sangma.
“Kam dei shuh kaba shah niewbein” ula bynrap bad ka kyntu ia ki samla ban pynsaphriang ia ki khubor ha ki rynsan social media.
Halor ka shongkha kaba shngain, u Myntri Rangbah ula ong “Ngan ym ong ba ka long kaba biang ban iashong kha hashuwa ban poi ha ka jinglong samla, hynrei lada jia ryngkhat, phi dei ban pynthikna ban pyndonkam ia u Condom. Lada don kiba pynbor ia phi, ka biang ban ong em”
“Kynmaw lada phim sngew long shngaiñ, ka lah ban don kaei kaei kaba bakla. Ngeit ia katei ka rukom sngew” ula ong ia ki samla.
