Shillong, Risaw 27: U Lat ka Jylla Meghalaya CH Vijayashankar ha ka sngi Baar, ula kyntu ia ka Indian Red Cross Society (IRCS), Meghalaya State Branch ba kan pyniar bad ban kynthup shuh shuh ia ki samla ha ki kam ban ai jingshakri ia ki parabriew.
Haba pyniaid ia ka Annual General Meeting jongka IRCS Meghalaya ha Lok Bhavan kum u President, u Lat ka Jylla ula iaroh ia kane ka Society kaba la leh ia ki kam ban pynneh pynman ia ki parabriew.
“Pynkhlain ia ki prokram ki jong phi, pyniar ia ka jingtreikam bad pyndonbynta shuh shuh ia ki dkhot khamtam eh ia ki samla khnang ba ka khyrwoh jong ka jingai jingshakri parabriew kan poi sha ki kyndong kynshrot jong ka Meghalaya” ula ong ha ka jingialang.
Haba pynpaw halor ki mat kiba sngewkhia, u Lat ula ong, ba ka jingpun khun ki khynnah, ka jingngop ha u droks bad ka jingshah ktah jong ka jingthung tang ia shi jait u jingthung kadei kaei kaei kaba hap ban iatreilang ban iada ia ka imlang sahlang bad ia ka mariang.
Ula ai ruh ia ka jingkyrshan ia ka jingtyrwa ban don ia ka ophis treikam kaba thymmai jong ka Society, da kaba pynpaw ba dei ban don ia ka jaka treikam kaba kyrpang kaban iarap ha kaban don ia ka jingiatreilang halor ki kam kiba iadei bad ki parabriew, ka jingai jinghikai bad ka jingshimkhia mardor haba don ki jingjia bad ula kyntu ban don ia ka jingiatreilang ban pynlong ia kane ka projek kaba urlong shisha.
Ha kane ka jingialang la wan ban iashimbynta da u Additional Chief Secretary sha u Governor u HC Chaudhary bad u Chairman ka IRCS Meghalaya u Paiem Laborious Manik S Syiem.
Kane ka jingialang jongka AGM kala iakren halor ki 4 tylli ki mat, ka jingpynskhem ia ki rai kiba la shim ha ka jingialang ka AGM kaba la long ha ka 3 tarik u Nohprah 2025, ka jingpdiang ia ka Annual Report 2025-26, ka jingmynjur ia ka Audited Financial Report jong utei u snem hi bad ka jingai jingbatai ha kaban tei ia ka ophis treikam kaba thymmai.
La pynkut ia kane ka jingialang da kaba iakren halor ki jingseisoh bad ka lynti kaba ka Society kan iaid nangne shakhmat.
