Boko, Risaw 27 : Ka jingkynnoh khaii dewiong beain kala paw pyrthei ha khappud ka Meghalaya-Assam, ha kaba haduh 30-40 tylli ki trok kit dewiong kila ieng lain hajan ka Athiabari Police Outpost, Meghalaya ban ioh rung sha Assam.
Kine ki trok la kynnoh ba kila ap ban wan ka por miet khnang ban ioh jam sha shiliang u pud. Ka khubor ka iathuh ruh ba hapdeng 200 haduh 300 tylli ki trok kila ieng lain ha ki thain Shallang, ba dang ap ban kit ia u dewiong.
U nongniah jong ka trok ba don u nombor AS18-C-0675 u iathuh ba u dewiong uba ki kit u dei uba mih na Shallang bad la kit ia u sha Haldhipara ha Boko.
Kat kum ka jingong jong u, ki trok kila iaid khlem ki kot ki sla kiba donkam, kynthup ka e-way bill bad transport challan. Ula kynnoh ruh ba ki trok ki hap ban siew T.1.5 lak kawei ka trok ban ioh ia ka lynti iaid lyngba ka syndicate kaba treikam ha khappud ki ar jylla.
La kynnoh ba kane ka syndicate ka dei kaba la pyniaid da uwei u briew na Assam hynrei ia kane ka jingkam ba iadei bad ka jingsiew, ka jingdonkti kane ka syndicate bad kiwei kiwei, ka dei ka bym pat lah ban pynshisha.
U dewiong uba khaii sha Assam u dei uba mih na ki par ha Meghalaya kynthup ha Mawtap, Tarajak, Langmar bad Gareng hashuwa ban khaii lyngba ka surok khappud Athiabari-Hahim ban poi sha Haldhipara, ki karkhana shna mawit bad kiwei kiwei ki karkhana ha Assam.
La kynnoh ba kine ki trai dewiong kila thied ia u dewiong hapdeng ka dor ba T.2,500 hduh T.4000 shi ton na Meghalaya bad die pat sha ki nongthied na Assam ha ka dork aba heh.
Nalor kane la kynnoh ba kawei pa kawei ka trok ka kit haduh 40-45 ton u dewiong ha ka shi lynti.
