Imphal, Risaw 26: Ka National People’s Party (NPP) Manipur State Unit, ka la pynrem jur ia ka jingshah thombor jong u Loken Khuraijam uba dei u myntri ka tnad Art and Culture bad Tourism ka sorkar Manipur bad u MLA uba mih khmat ia ka Wangoi Assembly Constituency.
Kane ka jingjia ka la jia ha ka por kumba 10:30 AM ha ka Sngi u Blei ha Wangoi Makha Leikai.U Myntri Khuraijam u dang leit sha katei ka jaka ban jurip ia ki kam pynroi kiba dang iaid shakhmat kiba iadei bad ki surok, ki nala um, bad kiwei kiwei ki jingtei paidbah hapoh ka konstitwensi jong u haba u la shah thombor.
Ka party ka la pynrem ia katei ka jingshah thombor kum ka jingmih na ka jingbym lah ban shah ia ka sain pyrthei, da kaba ong ba ka jingshah thombor ha ka met, ka jingkawang maw, lane ka jingthmu ia ki nongmih khmat paidbah kiba pyndep ia ki kamram jong ki ka long kaba ym lah ban pdiang ha ka imlang sahlang haka synshar paidbah.
Ka NPP ka la pynpaw ruh ba ym shym la don kano kano ka jingmynsaw ha katei ka jingjia, da kaba ai khublei ïa ka jingïarap ha ka por kaba biang jong u Minister’s Personal Security Officer (PSO) ban pynthikna ïa ka jingshngaiñ jong u.
Halor kane ka jingjia, ka NPP Manipur State Unit ka la kyrpad ïa ki paidbah nongshong shnong jong ka Wangoi Assembly Constituency ban pynneh ïa ka jingsuk, ban teh lakam ïa ka bor synshar, bad ban pynbeit ïa ki jingïapher ha ka saiñ pyrthei lyngba ka jingïakren kaba tei ym ban leh donbor.
