Shillong, Risaw 26 : Ka Khasi Students’ Union (KSU) ha ka sngi Nyngkong kala iathuh ba ka Sorkar Jylla kala kular ban sdang pyntreikam noh shen ia ka Facilitation Centre ha Umling, Ri-Bhoi bad ban rah iakren ia ka jingdawa ban sam bhah 80:20 ia ki trai shnong ha North Eastern Indira Gandhi Regional Institution of Health & Medical Sciences (NEIGRIHMS) bad ka Sorkar Pdeng.
U General Secretary ka KSU sala Reuben Najiar haba iakren bad ki nongthoh khubor hadien ba iakynduh ia u Myntri Rangbah Conrad K Sangma, ula ong ba ka KSU kala ban jur ia ki san tylli ki mat jingdawa kiba la buh hakhmat naduh ka 3 tarik Nailar-ban pyndam ia ka project ka Shree Cement ha East Jaintia Hills, pyntreikam ia ka Meghalaya Residents Safety and Security Act (MRSSA), pynkylla ia ka rukom treikam ha NEIGRIHMS, jingthungkam kaba shai bad ban pynkhlain ia ka Migrant Workmen Act.
U samla Reuben ula ong ba ka NEIGRIHMS ka dei ka mat kaba kongsan tam ban shimkhia mynta, namar ka jingïalang jong ka Governing Council kan long ha ka Sngi Ba-ar.
“ Ngi la ïohi ba kan don ka jingïalang jong ka Governing Council lashai, ha kaba u Myntri ka Sorkar Pdeng un ïashim bynta lyngba ka Video conference. Yn sa ïakren ïa ki mat bapher bapher kiba ngi la dawa, kynthup ïa ka 80:20 ratio bad ka thungkam lyngba ka NORCET,” u la ong.
Ka KSU ka la dawa ia ka jingdon bynta ka Sorkar Jylla ha katei ka Council bad ka la thoh sha u MP ka Tura Saleng Sangma, uba dei u dkhot jong ka Council, bad sha ki ophisar jong ka tnad ka koit ka khiah kiba leit ban ïashim bynta ha katei ka jingïalang.
“Ka NEIGRIHMS ka la kular ïa ngi ba kan rah ïa ki mat jong ngi sha ka Governing Council. Ngi la ïohi ïa ka thup jong ki mat ban ïakren, bad baroh ki mat kiba ngi la kdew ki don ha ka mat iakren,” ong u Naijar.
U la ong ba u Myntri Rangbah ka Jylla u la kular ban pynlong ïa ka jingïalang bad ka Ministry jong ka Sorkar Pdeng.
“Kane ka kam kala mih naduh u snem 2025. Ha ka 1 tarik Jymmang, ngi la pynlong ïa ka jingïakhih ha NEIGRIHMS bad hadien ka jingtuklar jong ka Sorkar Jylla, ngi la weng noh ïa ka jingïakhih hadien ba la ai jingkular ba kin pynbeit ïa ka jingïalang bad ka Ministry jong ka Sorkar Pdeng. Namar ba ka NEIGRIHMS ka dei ka Institute ka Sorkar Pdeng, kine ki mat ki dei ban ïakren pynbeit bad ka Sorkar Pdeng. U Myntri Rangbah u la ong ba un sa pynlong ïa ka jingïalang bad sa rah ïa kine ki mat sha u Myntri ka Koit ka Khiah jong ka Sorkar Pdeng,” u la ong.
Haba kren halor ka Meghalaya Residents Safety and Security Act (MRSSA), u samla Naijar u la ong ba wat hapdeng ka Act 2016, hynrei ym pat don ka jingkylla kaba khraw ha madan, katba ka jingwan rung jong ki briew sha ka Jylla ka nang kiew.
“Man la ka sngi ngi ïohi ba ka jingwan rung jong ki briew ka nang bun. Ki dkhot jong ngi ha ki circle bad ki district bapher bapher ki la ïoh bat ïa ki briew kiba la wan rung lyngba u pud u sam na Bangladesh bad na kiwei ki jylla. Namar ka jinglong jingman mynta ha West Bengal, Assam bad Bangladesh, ka Meghalaya ka la kylla long ka jaka kaba ki briew bym lah ban ithuh ki rung sha ka Jylla, namar ba ngim pat don ïa ka rukom treikam kaba biang ban peitngor ïa ki,” u la ong.
U la bynrap ba watla ki don ki Dorbar Shnong, hynrei kine ki briew ki lah ban lait na ka jingpeitngor namar don ki briew kiba ïarap ïa ki bad pynioh ïa ki ki kot ki sla.
“Lada pyntreikam hok ïa ka MRSSA, kan lah ban khanglad ïa kane ka jingeh bad ruh ïa ka jingwan rung jong u drok. Ym shym la shna ïa u drok ha Meghalaya; hynrei u wan na kiwei ki jylla bad ki ri. Lada ngi don ki jaka khmih ha man la ki district, yn lah ban khanglad ïa ka khaïi be-aiñ ïa u drok,” u la ong.
U la ong ba ka bor synshar district ka Ri-Bhoi kan pyni ïa ka jingbatai bad ka Detailed Project Report (DPR) na ka bynta ka centre ha Umling, bad yn sa pynlong ïa ka jingjurip shen.
“Ia ka District Task Force lah dep ban thaw la slem, hynrei haduh mynta ym pat don satia ka jingïalang jong ka committee bad ym pat lum ïa ki jingkhein. Ngi kwah ba ka MRSSA kan treikam pura. U Myntri Rangbah u la kular ba ka Sorkar ka shim ïa ki sienjam kawei hadien kawei, da kaba sdang na Umling bad nangta sha kiwei ki district kum ka Athiabari, Ratacherra bad ki jaka ha Garo Hills,” ong u samla Naijar.
Halor ka ain nongbylla bar jylla, u samla Naijar u la ong “Ki briew kiba wan rung sha ka Jylla bad ka jinrung kala nang kirew kum ki nongtrei bylla, khlem ki kot ki sla. Ka aiñ kaba don mynta ka tlot bha, kaba pynlong ïa kiba bun ki runar kiba don ki mukotduma ha kiwei ki jylla ban wan rieh ha kane ka Jylla. Dei na kata ka daw ba ngi la dawa ïa ka aiñ kaba kham bniah bad kaba kham khlaiñ. Naduh u snem 2024 ngi la ïakhun halor kane ka mat. La dep pynkylla ïa ka aiñ, hynrei mynta ngi dang ap ïa ka jingpynbna paidbah kaba pura,” u la ong.
Halor ka thungkam thungjam, u samla Naijar u la pynpaw ïa ka jingsngewbha halor ka jingpynduh noh ïa ka jingpynlong interview shimet na ka bynta ki kam Grade C, kaba la buh ban treikam naduh ka 1 tarik Kyllalyngkot, 2027.
“Ïa kane la dep ai hukum da ka Sorkar India naduh u snem 2016, hynrei ka Jylla ka dei tang ban pyntreikam ïa ka. Ka daw ba kim pyntreikam ka lah ban long namar ba kim kwah ïa ka jingtreikam kaba khuid bad kaba shai. Don ki jingkynnoh ba wat kiba aplai ïa ki kam nurse kontrak ruh ki hap ban siew pisa. Haduh katto katne ngi tip ba kum kine ki kam ki jia, hynrei ngim pat don ki sakhi kiba biang. Kine ki jingleh bym hok kin dang bteng katba ym pat don ka rukom treikam kaba biang ban khanglad ïa ki kam bamsap,” u la ong.
U la ïathuh ruh ba ka KSU ka la dep aiti ïa ki jingai jingmut ban pynkylla bad pynbha ïa ka rukom treikam jong ka Meghalaya Public Service Commission (MPSC) bad ki District Selection Committee (DSC).
Haba kren halor ka Shree Cement, u samla Naijar u la ong ba ka jinglong jingman ka dang neh kumba ka long bad la dep thaw ïa ka committee ban wad ïa ki jingshisha.
“Ngi la kyntu ïa ka Sorkar ba namar ba ka committee ka khot ïa baroh ki nongshong shnong na East Jaintia Hills ban wan sha Shillong, katto katne ki dei na ki longïing kiba duk, ka committee ka dei ban leit hi sha katei ka jaka ban peit ïa ka jingshisha ia kaei kaba long ba man ha madan. Ka dei ban peit kumno ki briew ki duh ïa ki jaka puta jong ki namar ki kompani kiba heh, bad kumno la pynlong ïa ka public hearing khlem da bud ïa ki kyndon aiñ bad da ka jingthmu kaba sniew. Ka kam ka dang ïaid shakhmat, bad ha ki sngi ban wan ngi khmih lynti ba kan don ka jingmih kaba seisoh,” u la ong.
Ha kaba pynkut, u samla Naijar u la ong ba man la ka por ba ki ïakynduh ïa ka Sorkar, la ju ai jingkular hynrei ka shimpor slem ban pyntreikam ïa ki. “Ngin ap bad peit la kine ki mat kin poi sha ka jingmih kaba seisoh ne em. Lada kim urlong, ngin sa shim da kawei pat ka lynti jong ka jingïakhun,” u la bynrap.
