Shillong, Risaw 26 : U MP barim ka Rajya Sabha bad State President ka NPP Dr WR Kharlukhi ha ka sngi Nyngkong, ula iathuh ba ula sangeh ban leit sha ki jingialang ka NDA hadien ka jingshem ba ka jingiadonlang bad ka Sorkar Pdeng kam don jingmih eiei.
Haba pynkynmaw ia ka por jong u kum u MP ka Rajya Sabha ha ka por ba ka MP barim ka Tura Agatha Sangma ka dang don ha Lok Sabha, u Dr Kharlukhi ula ong ba wat hapdeng ka jingpynsngew ia ki jingeh kum ka jingthungkam VC ha NEHU, ym shym la poi shano shano ka kam.
“Ka don ka jingsngew ba lada ngi iadon bad ka party kaba don ha ka bor ha Delhi, ngi lah ban iarap ia ki briew jong ngi. Hynrei lyngba ka jingshem dalade, Nga iathuh ha phi, shisien ba ngi poi hangtei…phi lah ban klet ia ka shuki VC ha NEHU, ha katei ka por ka Agatha ka don ha Lok Sabha, Nga don ha Rajya Sabha, ngi la thoh, hynrei ynda ngi poi hangtei, hooid ngi iakynduh ia ki Myntri Sorkar, ki sngap, hynrei kumba ju ong, ki kohnguh ka khlieh bad kyrngah ka tdong. Ki sngap hynrei ka kam pat kami aid” ula ong haba iakren bad ki nongthoh khubor ban pynpaw ia ka jingai jingkyrshan ia u President ka Congress Vincent H Pala ha ka elekshon shiteng samoi ka Shillong Lok Sabha.
“Hangtei nga sngewthuh ba kam lah ban long. Ngam ju iashimbynta ha ka jingialang ka NDA. Nga ju kren ia ki hynrei kim ju sngap” ong u Dr Kharlukhi.
Ula kyntait pat ban kynthoh ia ka jingiadei hapdeng ka NPP-BJP. “Ngam lah ban kynthoh eiei namar ngam don shuh bad ka NPP. Ka dei ka kamram jong ki ban kynthoh” ula ong.
Haba ai kyrdan ia ka jingtreikam ka MDA, ula ong ba ki paidbah kila dep ai kyrdang. “Ngi don artylli ki elekshon Parliament, kumta ka result kala batai” ula ong.
Halor ka jingkiew ka BJP na ka 2 ngut ki MLA sha ka 10 ngut, u Dr Kharlukhi ula ong ba ka test ia ki kan long ha u 2028.
