Tura, Risaw 23: Ka Tnad pule puthi ka Jylla hynne ka sngi Thohdieng, kala pynlong ia ka SPARK MEGHALAYA – School Programmes in Articulation, Resilience and Kindness – State Summit ’26, ha District Auditorium, Tura ha kaba u Myntri Rangbah ka Jylla u Conrad K. Sangma ula long kum u Kongsan.
Ha kane ka jingialang la wan ban iadonlang ki bor pyniaid district, ki heh ophisar na ka tnad pule puthi, ki Principal, nonghikai bad ki samla pule na kylleng ki skul na ki district bapher jong ka Meghalaya.
Haba kren ha ka jingialang, u Myntri Rangbah ula ong, ba ka long kaei kaei kaba sngewtynnad ban iadon ryngkat lang bad ki samla bad ula pynkynmaw ba ha u snem ba lah dep jong ka State Summit ha Shillong kadei kaei kaei kaba la ai jingmyntoi ban ioh ia ki jingshemphang bad ula pyntip ba ula ai jingmut ia ka kynhun jong ka SPARK ba ia katei ka Summit dei ruh ban pynlong ha Tura mynta ka snem.
“Ka daw ka long kaba kongsan bha ia ki khynnah ba kin sam lem ia ki jingshem ki jongki bad ban mad ia ka jingriewspah kaba shisha jong ka jylla, ka jingdon ia ki jaidbynriew bapher, ki kolshor, ka ktien ka kthylliej, ka khyndew ka shyiap, ka jingitynnad, ka bam bad ka tem ka put. Ka jingiaid lynti bad ka jingsah kidei shi bynta jong ka jingmad ia kaba yn lah ban rah nangne shakhmat” la ong u Myntri Rangbah.
Ula ong, ba u dap da ka jingkmen ban iohsngew na kiba bun ki samla pule ba kila wan iuhkjat ha ka sien kaba nyngkong ha Tura. “Kata hi kadei ka mat. Ka Summit kala ai ia ka lad na ka bynta ki samla ba kin ioh ban iakynduh bad ban iakren bad ruh ban sngewthuh ia ki kolshor bapher bad ia ki jinglong jingman jong ki paitbah” ula ong.
Ula pyntip ba un ialeh ban pyrshang ban sakhi ia ki prokram bapher jong ka SPARK Summit bad ka jingitynnad jong kane ka prorkam ka long ba man la ki riewshimet ki don ia la ka jinglong kaba kyrpang bad ki don ruh ia la ka sap ka phong.
“Baroh ki don ia ka jinglah bad phi lah jop lypa da kaba don hangne” ula ong ia ki nongiashimbynta bad ka batai ia ka jingthmu jong kane ka prokram ba kan pynlong ia kiei kiei kiba bha tam na ka bynta ki samla, ban long kiba skhem jingmut, ban long ki briew kiba bha, ban pynrung ia ka jingkordor jong ka jingim bad ka jingiadei paralok bad ka kyntu ia ki samla ba kin pynleit jingmut halade bad ban kiew shaphrang.
Ula ong, ba ka SPARK kam dei tang ka prorkam hynrei la iohi ruh ia ka ‘SPARK’ ne pliah ding ha ka tem ka put, kam ialehkai, jingsengkam lajong, jingshad bad ki jingdro dur.
“Kane ka prokram ka don ha pneh jong ka dohnud ban kyntiew ia ka sap ka phong bad ban ai ia ka jingskhem jingmut ban ong “Ngan pyrshang” ula bynrap.
U Myntri Rangbah ula ban biang ba ki samla kidei ki jingkhlain kiba khraw bad ka long kaba kongsan ia ka sorkar ban pyniasoh ia ka bor ka jongki ha ka rukom kaba dei bad ban plie ia ki lad ban pynthikna ba kin kylla long ka bor kaban tei ia ka Jylla bad ia ka Ri.
Haba pynshai halor ki sienjam kiba la shim da ka sorkar halor ki samla, u Myntri Rangbah ula ong, lyngba ka MGMP, 8,000 ki nongrwai bad nongtem kila leh ia kaei kaba ki ieid eh, kamai bad pynbyrngia palat ia 20,000 ki rynsan ha baroh kawei ka jylla, ri bad ha ka pyrthei ha kaba ki don kiba la leit pynbyrngia ha Japan bad Germany da ka jingkyrshan ka sorkar bad ula pyntip ruh ba ka CM Elevate program bad ia ki jingkynshew tyngka ha kaba iadei bad ki kam ialehkai.
Haba iaroh ia ka tnad pule puthi, ula pyntip ba kiba bun na ki prokram ha Meghalaya kidei kiba la pynbud ruh ha ki National Level bad ka ong, ba ka jingpynlut ha kum kine ki prorkam kam dei satia tang ka jingpynlut hynrei ka jingkynshew tyngka ban wanrah ia ka jingkylla ia ki samla.
Ha kane ka sngi la pyllait paitbah ruh ia ka SPARK Outcomes Report 2026, ki jingpyninam ia ka kolshor, ki jingphla na ki khynnah pule bad ki nonghikai bad ka jingpynkup burom ia ki District SPARK Stars.
