Shillong Risaw 23: U Symbud Myntri Rangbah uba khmih ia ka Kam Pohiing u Bah Prestone Tynsong ha ka sngi Palei, ula banjur ba ka aiñ kan thwet ia kiba donkti ha kaban kawang petrol bomb ha ki 4 tylli ki jaka ha nongbah Shillong ha kine ki 2 sngi kiba lah dep bad yn sa buh shuh shuh ia ki pulit ban pynkhlain ia ka jingai jingshngain ha ka nongbah.
“Kine ki jingwiang ding, kawang petrol bomb bad ki kam runar kiba lah jia man ka sngi ne man ka miet, ka aiñ kan thwet ia ki. Ngi kwah ban shim da ki sienjam kiba tyngeh ia kino kino kam sniew kiba long pyrshah ia ka shongsuk shongshngaiñ bad kiba pynmih ia ki jinghuri hura khamtam eh ha nongbah Shillong,” ong u Bah Tynsong haba iakren bad ki nongthoh khubor.
Ula ong, ba ula lum ia ka jingialang ha ka sngi Palei bad ki bor pyniaid district kila shimkhia ia ka kam.
“Ka aiñ ka dang bud bha ia ki nadien. Ngi lah don biang ia ka jingialang bad mynta ka sngi la pynlong ruh ia ka Review Meeting. Ki bor pyniaid district kila khmih bniah ia kane ka kam” ula ong.
U Bah Tynsong ula ong, ba lah dep ruh ban ai ka jingbthah ia baroh ki ophis treikam kiba don ha kylleng ka sor Shillong ban long kiba husiar, ban pyndiat ia ki kor CCTV bad ban pynthikna ia ka jingshngain ia ka jaka pynieng ia ki kali sorkar bad ia ki jingdon jingem.
“Lah ai jingbthah ia baroh ki ophis treikam kiba don ha kylleng ka sor Shillong ba kin long kiba husiar bha bad ban don ia ki CCTV bad ka jaka pynieng ia ki kali sorkar ne ia ki jingdon jingem ba dei ban buh ha ki jaka kiba shngain ban lait na kino kino ki jingshah leh ia ki kam sniew.
Ula banjur ba yn ym don jingmap satia ia ki runar, ula ong, “Ha kaba iadei bad ka jingsngewkhia jong ka sorkar, ngi long kiba skhem ban wad bad ruh ba ka aiñ kan thwet ia ki bad ngin ym map iano iano ruh lada lap ba kila leh ia kitei ki kam be-aiñ bad ia ki kam runar”.
Haba kylli la ka don kano kano ka kynhun kaba donkti, u Bah Tynsong ula ong, ka paw kumba kadei ka jingjia kaba ia ki kam sniew kala jia tang ha ki katto katne ki jaka.
“Ia mynta hi, ngim pat lah ban ong eiei, namar ba kala jia ha ki katto katne ki jaka. Nga sngew ba ka kynhun ki runar ne lehse ki runar shimet kidei kiba donbynta ha kum kine ki jait kam. Ngan ym lah ban iathuh thikna ia phi, la kadei ka kynhun ne la ka don kano kano ka kynhun sengbhalang kaba long pyrshah ia ka sorkar, hynrei kino kino ruh kiba leh ia kine ki kam sniew ne ia kino kino ki kam kiba be-aiñ, ngi dang buddien bha ia ki” ula ong.
Ula bynrap, “Ngi lah pan shuh shuh ia ki bor pahara bad ha kine ki khyndiat sngi ngin sa ioh shuh shuh ia ki bor pahara ban ioh pynkhlain ia ka jingshngain ha Shillong”.
