Shillong, Risaw 21: Ki nongdie dukan madan ba la kyrshan da ka Thma U Rangli Juki (TUR) ha ka sngi Balang, ki la dawa ia ka Sorkar ban weng noh mardor ïa ka notice jong ka Shillong Municipal Board kaba la pynmih ha ka 16 tarik u Risaw kaba pynbna ïa ka surok GS sha Iewmawlong kum ka No Vending Zone, da kaba ong ba ka long beaiñ bad ba shu leh donbor.
Haba kren na ka bynta ki nongdie madan hadien ba la wai ka jingialang, ka nongialam ka TUR kong Angela Rangad ka la ong ba katei ka notice ka la wanrah ia ka jingklumar jingmut ia ki nongdie madan na GS Road, Motphran, Jeep Stand bad Iewmawlong kiba la shah bthah ba kin pynlait noh hapoh ka 25 tarik u Naiwieng ia ki jaka shong dukan bad ban kynriah sha Iewmawlong Parking Lot.
“Ki nongdie madan ki la hap ban shong jingialang kyrkieh namar ka notice na u CEO, Municipal. Ka long kaba sngewsih.Ka ong ba baroh ki nongdie jingdie madan naduh GS Road haduh Motphran kin hap ban kynriah. Kane ka dei ka jingpynbna be-ain bad ka la wan tang kum ka jingleh donbor jong ki katto katne ki riew shimet ha ka sorkar ha ka kyrteng jong u PTVC” ong u kong Angela.
Ka la pynskhem ba ki dkhot ba shisha jong ka PTVC kim don bynta ha kane ka rai.
“Ngi dei ki nongmihkhmat ba shisha jong ka PTVC. Ngi tip ia ki jingiakren halor ka GS Road bad Motphran. Ngim ju rai marwei. Ngi ia lum lang namar ngi kwah ba ki nongdie madan hi kin peit la ki jaka ba la ai da ka sorkar la ki long ne em kiba biang na ka bynta ka kamai kajih”, ka la ong.
Ka kong Angela ka la kynthoh ba katei ka jaka ka dei ka iew pateng kaba la iada katkum ka ain.
“Kine ki jaka ki dei ki iew ba la rim bha – Iewduh, Iew Mawlong. Ka iew ka kham rim ban ïa ki jaka ba marjan jong ka. Ka aiñ hi ka ong ba phim lah ban beh ïa ki briew na ka iew ba la rim. Hynrei ki kwah ban thep ïa baroh bad bret ïa ki ha kawei ka jaka ieng kali kum ki blang bad ki masi tang namar ba kim kwah ban ïohi ïa ki,” ka la ong.
Ka la kynnoh ba ka SMB kala pynkheiñ bunsien ïa ka aiñ, Street Vendors (Protection of Livelihood and Regulation of Street Vending) Act, 2014.
“Mynshwa ki trok municipal ki wan ban beh ia ki nongdie madan bad ban rah ia ki mar ki mata jong ki, ngi la iakhun ban ioh ia ka ain, mynta hadien ba la ioh ia ka ain, phi pyndonkam bakla ia ka ain”, ka la ong.
Haba jer kyrteng ïa ki lad ki lynti ba la tyrwa da ki nongdie madan, ka kong Angela ka la ong, “Ngi la ai jingmut ïa ka Them Motor hadien ba ngi la ïakren bad ka Cantonment Board, ban shna ïa ki godown, ki iew ki nongdie madan bad ki ïing hangtei. Ngi la ai jingmut ia ka Lum Survey kaba dei ka jaka ba jakhlia bad kaba dap da ki nongdie drok, balei ym shna na ka bynta ki nongdie dukan madan na GS Road hangtei. Na ka bynta ki nongdie madan ha Iew Mawlong ngi la ai jingmut ban buh ïa ki ha Syndicate Bus Stand – ki bus ha khrum, ka ïew halor.”
“Dei ban ia sam ia ka jingpynkynriah kaba biang – ki nongdie madan na GS Road sha Lum Survey, Iew Mawlong sha Syndicate, ki nongdie madan na Anjeeli sha Parking Lot Tabung sha ka mala ba nyngkong. Lada phi bret lut ia baroh ha ka jaka ieng kali, shano ki kali kin leit?” ka la kylli.
Ka la khot ruh ia ka Provisional Town Vending Committee kaba long be-ain.
“Ka samoi trei kam jong ka PTVC ka la kut. Ka kam ka Committee ka long ban survey, ban ai laisen bad ban pynlong ia ka elekshon da ki nongshong dukan madan kiba don 40% kumta ia ki rai la shim da kaba thep vote. Hynrei ha Laitumkhrah bad mynta hangne, ia kaei ba la ia mynjur lang la pynkylla tang shi miet da u Commissioner Secretary”, la kynnoh ka Kong Angela.
Haba ai por shi taiew, ka kong Rangad ka la ong, “Ngi la rai da kawei ka sur ban kyrpad ïa ka sorkar ban weng noh mardor ïa ka notice. Ngim shah ïa kane ka jingthombor ha kane ka kynti. Lada ym lah ban weng noh hapoh shi taiew, kan don ka jingïakhih kaba jur namar ba phi thombor ïa ka mon jong ki paidbah bad phi ïaid lait ïa ka aiñ.”
