Shillong, Risaw 21: ka Hynniewtrep Youth Council (HYC), Umwai Unit ka la ioh ban bat ia uwei u briew ba suba nong Bangladesh uba la wan rung be-ain sha India ha ka janmiet 20 tarik Risaw.
Ia une u suba nong Bangladesh la ioh bat ha ka shnong Umwai ha ka por kumba 6:30 baje janmiet da ki dkhot ka HYC ha ryngkat ki nongshong shnong.
Ha ka jingtohkit la lap ba um dei satia u nong India bad u la wan rung be-aiñ sha kane ka Jylla, ong ka HYC.
Hadien la bat ia u, ka HYC kala aiti noh sha ki pulit ban pynshisha bad ban leh ia kaba donkam katkum ka ain.
Haba kyntu ïa ki bor ba dei peit ba kin leh da kaba tyngeh pyrshah ïa ki jingwan rung beaiñ, ka HYC ka la ong ba kum kane ka jingwan rung bein khlem da pyrkhing ka buh jingma ïa ka shongsuk shongsaiñ jong ka jylla bad ka jaidbynriew.
Ka la kyrpad ruh ia ki paidbah ba kin long kiba husiar.
