Ukhrul, Risaw 20: Kawei ka shnong jong ki Kuki-Zo ha ka distrik Ukhrul, ka la kylla dpei hadien ka jingshah thang ha ka step synia sngi Ba-ar kaba la pynjur ïa ka jingïakynad ha shilynter ka surok bah National Highway 202. Ha katei ka jingjia ym shym la don ba iap.
La iathuh ba katei ka jinghiar thma, ka la sdang ha ka por 1 baje eiei mynstep jong ka sngi Ba-ar, ha Patleijang, kaba dei ka shnong jong ka Chepu Yaolen, kaba don ha NH-202. Katkum ki heh ophisar bad ki tyllong khubor na ka thaiñ, ki suba lehnoh ki la thang ïa ki ïing bad la kynnoh ba ki la siat kumba lai sien na ki tiar siat automatic sha suiñ bneng shwa ban phet na katei ka jaka.
Ka Working Committee jong ki Kuki Civil Society Organisations (WCKCSO), Ukhrul, ka la pynrem ia katei ka jingjia bad ka la kynnoh ba ki dkhot jong ka NSCN (IM), kiba treikam na ki jaka ba marjan, kiba kynthup ia ka Sikibung, Leingangching bad u T.M Kasom, ki dei kiba donkti ha katei ka jingthang iing.Ia ki jingkynnoh ym shym la pynshisha.
Ka committee ka la buh jingkylli ruh ia ka jingpynbeit ia ka bor pahara ha katei ka thain, da kaba kdew ba ka jingpynslem ban pynpoi ia ki Border Security Force (BSF), kaba la iathuh ba la buh ban buh ha ka 19 tarik u Risaw hynrei ka la jia ha ka 20 tarik u Risaw.
“Haba don ki BSF ha TM Kasom, ki shipai ha Leingangching, bad ki bor pahara kiba don hajan, kumno yn lah ban thang ïa baroh kawei ka shnong khlem da tuklar?” ka committee ka la kylli.
Ki WCKCSO ki la kynnoh ruh ba ka don ka jingkhmih bniah kaba jied da ki tnad tohkit bad ki la dawa ruh ban pynbeit ia ka jingpahara kaba neh ha Patleijang bad Chepu Yaolen khnang ban iada na ka jingshah thombor kaba kham jur.
Ha kajuh ka por, ki jingkynnoh kiba ïakhun pyrshah ki la saphriang ha ki social media ha kaba ïadei bad ki daw kiba lah ban don ha lyndet jong ka jingthang, kynthup ïa ki jingïakynad ba la kynnoh ba ki don ha ka thaiñ kiba ïadei bad ki nongïalam shnong bad ka jingshah pynkynriah jaka.Kine ki jingkynnoh ki dang sah khlem da pynshisha.
La iathuh ba ki bor pahara kiba khynra kiba kynthup ia ki shipai Assam Rifles, BSF, Central Reserve Police Force (CRPF) bad CoBRA unit ki la nang pynjur ha kylleng ka Ukhrul bad ki jaka ba marjan hapdeng ka jingsngewkhia halor ka jingjur shuh shuh ka jingkulmar.
Kane ka jingjia ka wan hapdeng ki jingjia kiba sniew ha ka thain mihngi jong ka Manipur.Ki jingjia jong ka jingshah thombor bad ka jingthang ding ki la mih ha ka District ba marjan jong ka Kamjong ha kine ki sngi ba la dep.Ki khubor ki la mih ruh ba uwei u riew paidbah u la shah pyniap ha ki thain Leimakhong ha ka jingjia kaba la kynnoh ba ka donkti ki kynhun kai khlaw.
Ki bor pyniaid district ki la pynjur ia ka jingpahara, katba ka jingtohkit halor ka jingthang ding ha Patleijang bad kiwei kiwei ki jingjia ki dang iaid shakhmat.
