Shillong, Risaw 17 : Haba byrngem ban phah tular ha ka Iingkashari High Court, ka Shillong Bar Association ha ka sngi Thohdieng kala ong ba kan pyndonkam lut ia baroh ki lad ki lynti jong ka ain hadien ba ka Sorkar kala kyntait ban ai ia ki jingtip bala pan lyngba ka RTI halor ka jingpynlut na ka bynta ka Ophis u Advocate General Amit Kumar.
Ka Association kala dep ban aiti ia ka jingkyrpad ba nyngkong hadien ba u PIO ula kyntait ban ai jubab ia ka RTI bala aiti ha ka 10 tarik Nailar, 2026, haba pynpaw ba la pynlait ia ka hapoh ka kyndon 8.
“Kumjuh ruh kawei ka jingkyrpad kaba ngi la pan ka dei halor ka jingpan RTI ba 10 tarik Nailar, 2026, ia kaba ngi khlem ioh satia ia kino kino ki jingtip ba ngi pan” ong u Assistant Secretary N Shyambor Sing Marpna.
U Secretary TL Jyrwa ula ong “Hadien ka jingkyntait ia ka jubab RTI, ngi la shim shuh shuh ia ki sienjam bad kata ka long ba ngi la aiti ia ka jingkyrpad kaba dang sahteng mynta. Kumba phi tip, ki don ki kyndon kiba la buh ha ka ain RTI bad ka don da ka por bala buh ban shim rai halor ki aplikeshon”.
U Bah Marpna u la pynpaw ba ka jingpyndonkam jong u PIO ïa ka kyndon 8 kum ka daw ban kyntait ïa ka jingtip kam long kaba ieng nongrim haba ka jingmyntoi paidbah ka kham khia ban ïa ka jingiada ïa ka jingtip shimet.
“Ka jingpynlait na ka jingai jingtip ka treikam lada ka dei ka jingtip kam shimet, lane lada ka jingpynpaw ïa ka jingtip kan buh jingma ïa ka jingshngaiñ jong ka ri, lane lada ka jingïakren jong ka Cabinet ka dang ïaid bad ym pat shim rai. Kine ki dei ki mat kiba hap hapoh ki jinglait na ka jingai jingtip. Hynrei, wat ha ka bynta jong ka jingtip shimet, kine ki jingpynlait kim dei kiba treikam ha baroh ki khep. Lada ka jingmyntoi paidbah ka kham khia, dei ban ai ïa kata ka jingtip. Kane ka ktah ïa ngi, kumta ki dei ban ai ïa ka jingtip,” u la ong.
“Ka aplikeshon kaba nyngkong la kyntait da u PIO, uba la kdew ïa katei ka jingpynlait hapoh ka Section 8,” u la bynrap.
Haba batai ïa ki sienjam kiban bud, u Marpna u la maham ba kane ka jingïakhun kan poi haduh ka High Court.
