Shillong, Risaw 17 : Ka Shillong Bar Association bad ka High Court of Meghalaya Bar Association kila rai ban pynjur ia ka jingiakhih pyshah ia kaei kaba ki ong ka jingbym shimkhia jong ka Sorkar MDA ban weng ia u Amit Kumar kum u Advocate General, haba leit mudui ruh da ka mukotduma sha ka Iingkashari pyrshah ia ka kyndon thymmai ka Sorkar ba nang aibor ia u AG.
Kine ki artylli ki Bar Association kila ujor ia ka PIL ba tynjuh pyrshah ia ka jingpynbna ba 16 tarik Nailur jong ka Sorkar, kaba pyntreikam ia ka Meghalaya Panel Advocate (Empanelment & Engagement) Guidelines, 2026.
Haba kren sha ki lad pathai khubor halor ka rai da ka jingialang General body ha ka sngi Thohdieng, u Assistant Secretary ka Shillong Bar Association N Shyambor Sing Marpna ula ong ba ki dkhot kila iarai lang kawei ban pynbteng ia ka jingiakhih.
“Ngi la khot ia ka jingialang general body ban pyntip shaphang ka jinglong jingman bad haduh katno ngi la iaid bad ka jingiakhih. Ngi la sngap ia baroh ki dkhot ba ha kano ka rukom ki jingiakhih kin iaid. Ngi la iashim railing ba ngin pynbteng” ula ong.
U Bah Marpna ula ong ba ka Bar kala iakynduh nyngkong ia u Symbud Myntri Rangbah ha ka 2 tarik Nailur, uba la kular ba u AG Amit Kumar un nym mihkhmat sha Iingkashari haduh artaiew.
“Shuwa ban kut ka artatien, u Myntri Rangbah ula khot ia ngi sha Iingsah ha ka 16 tarik Nailur bad ha kajuh ka sur ula ong ba un sa khmih ia kane ka kam. Ula pan por artaiew haduh ka 7 tarik Risaw. Ngi la mynjur bad pynsangeh ia ka jingpep ban leit sha Iingkashari” ula ong
Hynrei, u AG la kynoh ba ula pynkhein ia kane ka jingkular.
“Hadien ka 16 tarik Nailur, u Amit Kumar ula mihkhmat ym tang ha High Court hynrei ha kiwei ki kashari ruh, kaba pynkhein ia ka jingiapynbeit hapdeng u CM bad ma ngi. Kumta ha ka 30 tarik Nailur, ngi la khot ia ka jingialang bad rai ban pyniaid beit ia ka jingsangeh leit iingkashari” ong u Bah Marpna.
U iathuh ba ka Sorkar ha kajuh ka sngi jong ka jingialang u CM, kala pynmih ia ki kyndon kaba lah ban pynmih ia ka jingpyrshah.
“Ngi ioh jingtip kham hadien ba ha ka 16 tarik Nailur, ka Sorkar kala pynmih ia ka jingpynbna ia ka Meghalaya Panel Advocate Guidelines, 2026. Lada phi pule ia ka, ka ai bor pura ia u AG ban jied ïa ki nongïasaid aiñ sha ka panel, ban weng ïa ki na ka panel, lane ban pynduh noh ïa ka jinglong dkhot jong kino kino na ka panel. Ngim tip ïa ka jingthmu jong kane,” ong u Bah Marpna.
Ka PIL bala ujor arsngi mynshuwa, ka dawa ban pyndam noh ia ka jingpynbna bad wanrah ia ka rukom jied ïa ki nongïasaid aiñ jong ka sorkar kaba hok, kaba shai bad kaba pynshong nongrim ha ka jingtbit. Ka dawa ruh ïa ka jingtip bala pan lyngba ka RTI kaba la aplai ha ka 10 tarik Nailar, 2026.
“Ngi la ujor ia ka PIL ba tynjuh pyrshah ia ka jingpynbna bad kiwei ki jingpynbna ban jied ia ki nongiasaid ain sah ka panel. Namar ba ka long sub judce ngin ym ngam jylliew ia ka” ula ong.
